The Second Book of Chronicles
7 Now as Sol′o·mon just pray finish, fire come down from the heavens and burn the offering wey them de burn and the sacrifice them, and Jehovah glory full the house. 2 The priests no fit enter the house of Jehovah, because Jehovah glory full the house of Jehovah. 3 And all the people of Israel de look when the fire come down and the glory of Jehovah come ontop the house, them come bow down face ground ontop the cement floor and lie down for ground, and thank Jehovah, “because e good; im love wey no de fail de last forever.”
4 Now the king and all the people do sacrifice them for front of Jehovah. 5 King Sol′o·mon use 22,000 cows and 120,000 sheep do sacrifice. Na so the king and all the people dedicate the house of the true God. 6 The priests stand for where them de do their work, and na so the Levites stand too, and them hold instruments wey them de use play songs to Jehovah. (King David make this instruments to use them thank Jehovah, “because im love wey no de fail de last forever.” David de do this one when e de praise God with them.*) And the priests de blow the trumpets loud for front of them, and all Israel people stand.
7 Then Sol′o·mon make the middle of the compound wey dey front of the house of Jehovah holy, because na there e do the offerings wey them de burn and the animal fats for peace sacrifice them, because the copper altar wey Sol′o·mon be make no big reach for the sacrifice them wey them de burn, the grain offerings, and the animal fats. 8 That time, Sol′o·mon do the festival for seven days with all Israel people. The people wey gather plenty well-well. Them come from Le′bo-ha′math* go reach the Lowland* of Egypt. 9 But for the eighth day,* them do holy occasion, because them be don use seven days do the dedication of the altar, and seven days for the festival. 10 Then for the 23rd day of the seventh month, e talk say make the people go their house, and them de happy and belle de sweet them because of the good things wey Jehovah don do for David and Sol′o·mon and im people Israel.
11 Na so Sol′o·mon take build the house of Jehovah and the house* of the king finish; and everything wey Sol′o·mon get for mind to do about the house of Jehovah and im own house, e succeed to do-am. 12 Then Jehovah appear to Sol′o·mon for night and tell-am say: “I don hear your prayer and I don choose this place for myself as house for sacrifice. 13 When I lock the heavens and rain no de fall, and when I command the grasshoppers say make them chop the things for the land, and if I bring sickness wey de spread among the people, 14 if my people wey them use my name call bring their body down, pray, look for me, and stop to do the bad things wey them de do, then I go hear from the heavens and forgive their sin and heal their land. 15 Now my eyes go dey open and my ears go really listen to the prayer wey them go pray for this place. 16 And now I don choose this house and I don make-am holy so that my name go dey there forever, and my eyes and my heart go always dey there.
17 “And you, if you serve me as your papa David serve me, as you de do everything wey I command you, and you de obey my directions and follow my judgments, 18 then I go make your kingdom strong, just as I promise David your papa say, ‘Man wey go rule for Israel go always dey for your family.’ 19 But if una stop to obey my laws and my commandments wey I don give una, una come start to worship other gods and de bow down to them, 20 I go uproot Israel people from my land wey I don give them, and this house wey I don make holy for my name, I go comot-am from my front and I go make-am to become something wey all the people go laugh* and them go use-am do yeye. 21 And this house go scatter reach ground. Everybody wey de pass go look-am with surprise and talk say, ‘Why Jehovah do this land and this house like that?’ 22 Then them go talk say, ‘Na because them leave Jehovah the God of their papa-papa them, wey bring them from the land of Egypt, them come go meet other gods de bow down to them and de serve them. Na because of this one e make them get all this serious problem.’”