The Second Book of Chronicles
36 Then the people of the land take Jo·si′ah son wey be Je·ho′a·haz and make-am king for Jerusalem to rule after im papa. 2 Je·ho′a·haz dey 23 years when e start to rule as king, and e rule for three months for Jerusalem. 3 But the king of Egypt comot-am as king for Jerusalem and e force the people of the land to pay 100 silver talents* and one gold talent as fine. 4 Another thing be say the king of Egypt make Je·ho′a·haz brother E·li′a·kim king to rule Judah and Jerusalem, and e change im name to Je·hoi′a·kim; but Ne′cho carry im brother Je·ho′a·haz and bring-am come Egypt.
5 Je·hoi′a·kim dey 25 years when e start to rule as king, and e rule for 11 years for Jerusalem. E continue to do wetin bad for the eyes of Jehovah im God. 6 Neb·u·chad·nez′zar wey be king of Babylon come attack-am so that e go tie-am with two copper chains and carry-am go Babylon. 7 And Neb·u·chad·nez′zar take some of the things wey them de use for Jehovah house go Babylon and e put them for im palace for Babylon. 8 As for the other story about Je·hoi′a·kim, the serious bad things wey e do, and the bad things wey people know about-am, them write-am for the Book of the Kings of Israel and Judah; and im son Je·hoi′a·chin start to rule as king after-am.
9 Je·hoi′a·chin dey 18 years when e start to rule as king, and e rule for three months and ten days for Jerusalem, and e continue to do wetin bad for Jehovah eyes. 10 For the beginning of the year, King Neb·u·chad·nez′zar send im men to go bring-am come Babylon, and them still bring the better-better things wey dey Jehovah house, and e make Zed·e·ki′ah wey be im papa brother king to rule Judah and Jerusalem.
11 Zed·e·ki′ah dey 21 years when e start to rule as king, and e rule for 11 years for Jerusalem. 12 E continue to do wetin bad for the eyes of Jehovah im God. E no carry body down for front of prophet Jeremiah, wey talk wetin Jehovah don command. 13 E still turn against King Neb·u·chad·nez′zar, wey make-am swear with the name of God, and e continue to dey stubborn* and get wicked heart, and e no gree obey Jehovah the God of Israel. 14 That time, all the leaders of the priests and all the people de do things wey really bad, them de do the serious bad things wey the nations de do, and them dirty the house of Jehovah wey e don make holy for Jerusalem.
15 Jehovah the God of their papa-papa them continue to use im messengers warn them, e warn them again and again, because e feel pity for im people and e no want make them destroy im temple. 16 But them continue to laugh the messengers of the true God, and them no take wetin e talk as anything, and them laugh im prophets, until Jehovah really vex for im people, until their matter no get solution again.
17 So e make the king of Chal·de′a people come fight them, and e use sword kill their young men for their holy place; e no pity any young man or virgin, old person or person wey im body no strong. God put everything for im hand. 18 All the things wey them de use for the house of the true God, big and small, and all the better-better things for Jehovah house and the better-better things wey the king and im leaders get, e carry everything come Babylon. 19 E burn the house of the true God reach ground, e scatter the wall of Jerusalem, e burn all the strong towers with fire, and e destroy everything wey get value. 20 E carry the people wey them no use sword kill go Babylon as slaves, them come be servants for im and im sons until the kingdom of Persia start to rule, 21 to make wetin Jehovah use Jeremiah talk happen, until the land don pay im sabbaths finish. All the days wey the land dey empty, e de keep im sabbath, to make 70 years complete.
22 For the first year of Cyrus wey be king of Persia, to make wetin Jehovah use Jeremiah talk happen, Jehovah move the spirit of Cyrus wey be king of Persia to make one announcement for all im kingdom, and e still write-am. E talk say: 23 “This na wetin Cyrus wey be king of Persia talk, ‘Jehovah the God of the heavens don give me all the kingdoms of the earth, and e don give me work say make I build house for-am for Jerusalem, wey dey Judah. Anybody among all of una wey be im people, make Jehovah im God dey with-am and make e go up.’”