Nehemiah

6 Now, as them just tell San·bal′lat, To·bi′ah, Ge′shem wey be Arabia person, and the rest of our enemies say I don build the wall again, and say no place for the wall open again (even though say that time I be never put the doors for the gates). 2 Quick-quick, San·bal′lat and Ge′shem send me this message: “Come, make we put time to meet each other for the village them wey dey the Level Land* of O′no.” But their plan na to do me bad. 3 So I send people go tell them say: “I de do big work, I no go fit come down. Why I go leave the work come meet una, make the work stop?” 4 Na four times them send me the same message, and each time na the same thing I tell them.

5 Then San·bal′lat send im servant to me to come tell me the same message for the fifth time, and letter wey them no seal dey im hand. 6 Them write for the letter say: “Them de talk this thing among the people of the nations, and Ge′shem de talk-am too say, you and the Jew people de plan to turn against the king. Na im make una de build the wall, and them talk-am for this reports say you want be their king. 7 You don still choose prophets to announce about you for the whole Jerusalem say, ‘King don dey for Judah!’ And them go tell the king this things. So come, make we discuss this matter together.”

8 But I send this message back to-am say, “Any of the things wey you de talk never happen, you just de talk wetin you de think for your own mind.”* 9 Because all of them de try put fear for our body, de talk say: “Their hands go weak for the work and them no go fit do-am.” Now, I de pray say, make you make my hand strong.

10 Then I go the house of She·mai′ah wey be the son of De·la′iah the son of Me·het′a·bel, and that time e no de comot from house. E talk say: “Make we put time to meet for the house of the true God for inside the temple, and make we close the doors of the temple because them de come kill you. Them de come kill you for night.” 11 But I talk say: “Person like me suppose run? Person like me fit enter the temple and still dey alive? I no go go inside!” 12 Then I see say no be God send-am, but say na To·bi′ah and San·bal′lat pay-am to talk this things against me. 13 Them pay-am to put fear for my body and to make me sin. So that them go get wetin them go take spoil my name and talk bad things about me.

14 O my God, abeg remember To·bi′ah and San·bal′lat and this things wey them do, and make you still remember No·a·di′ah wey be woman prophet and the other prophets wey de try put fear for my body.

15 So we complete the wall for the 25th day of E′lul, and na 52 days we use.

16 As all our enemies just hear-am and all the nations wey surround us see-am, shame catch them no be small,* and them see say na our God help us do this work. 17 That time, the important men of Judah de send plenty letters go give To·bi′ah, and To·bi′ah de send letters back to them. 18 Many people for Judah swear say them go support-am because im na in-law of Shec·a·ni′ah wey be the son of A′rah, and im son Je·ho·ha′nan be don marry the daughter of Me·shul′lam wey be the son of Ber·e·chi′ah. 19 Another thing be say, them de tell me good things about-am everytime, and them go tell-am wetin I talk. Then To·bi′ah go send letters to put fear for my body.