Deuteronomy
17 “Make you no do sacrifice to Jehovah your God with bull or sheep wey part of im body no complete or wey something do, because that one go be serious bad thing to Jehovah your God.
2 “If you see any man or any woman wey dey with you for any of your cities wey Jehovah your God de give you wey de do wetin bad for the eyes of Jehovah your God and de do wetin dey against im agreement, 3 and e comot for the correct road and de worship other gods, and e bow down to them or to the sun or the moon or all the stars for the heavens,* something wey I no command. 4 When them tell you or you hear about-am, then make you check the matter well. If you confirm-am say na true say the person do this serious bad thing for Israel, 5 you must bring the man or the woman wey don do this bad thing come out to the city gate and you must stone the man or the woman till e die. 6 From wetin two people or three people talk,* make you kill the person wey suppose die. Make you no kill-am just from wetin one person talk. 7 Make the people wey talk be the first to stone-am till e die, and after, all the people go stone-am. You must remove bad thing from among una.
8 “If any matter happen for one of your cities, wey too dey hard for you to judge, whether na matter wey concern person wey them kill, or the right wey person get according to law wey person bring come, or na fight-fight* wey them cause, or other matter them wey them de argue about, make you ready and go the place wey Jehovah your God choose. 9 Go meet the Levites wey be priests and meet the judge wey de serve that time,* and ask wetin you want ask, and them go let you know the decision. 10 Then you must follow wetin them don decide for you from the place wey Jehovah choose. Make sure say you follow everything wey them tell you make you do. 11 You must follow the law wey them show you and follow the decision wey them tell you. Make you no turn from the decision wey them go give you, whether na to go right or go left. 12 The man wey do wetin e no get the right to do as e no listen to the priest wey de work for Jehovah your God or to the judge must die. You must remove wetin bad from Israel. 13 Then all the people go hear and them go fear, and them no go do wetin them no get the right to do again.
14 “When you enter the land wey Jehovah your God de give you and you don take-am as your own and you de live for inside and you talk say, ‘Make I choose king for myself like all the nations around me,’ 15 if e happen like that, make you no fail to make person wey Jehovah your God choose as king. You go choose king from among your brothers. Make you no ever choose stranger wey no be your brother as your king. 16 But, make e no gather plenty horse for imself or make the people go back to Egypt to get more horse since Jehovah don tell una say, ‘Make una no ever go back again to that place.’* 17 And make e no marry plenty wives for imself so that im heart no go comot from the correct road, and make e no gather plenty silver and gold for imself. 18 When e don sitdown for the throne of im kingdom, e must copy this Law for imself for inside book,* from the one wey the Levites wey be priests keep.
19 “Make e continue to dey with-am and e must read-am all the days of im life, so that e fit learn to fear Jehovah im God and obey all the things wey this Law talk and follow this commandments. 20 Then im heart no go make-am carry imself up pass im brothers, and e no go turn comot from the commandments, whether na to go right or go left, so that e fit continue to rule im kingdom for long time, im and im sons wey dey for Israel.