Deuteronomy

12 “This na the laws and the decisions wey una go make sure say una follow for all the days wey una go dey alive for the land wey Jehovah the God of your papa-papa them go give you as your own. 2 All the places wey the nations wey una go collect their land don serve their gods, make una destroy them finish, whether na ontop high mountains or ontop hills or under any big fine tree. 3 Una go destroy their altars, scatter their idol pillars, burn their idol poles* inside fire, and destroy the image of their gods wey them carve, and wipe their names comot from that place.

4 “Make una no ever worship Jehovah una God for that way. 5 Instead, make una find Jehovah una God for any place wey e choose to put im name and the place wey e dey among all una tribes, and go there. 6 Na there una go bring una offerings wey them de burn, una sacrifice them, una tithes,* the contributions from una hand, una vow* offering them, the offerings wey una heart move una to give, and the firstborn of una cows and sheep. 7 Una and the people for una house must chop for there for front of Jehovah una God and happy for everything wey una don do, because Jehovah your God don bless you.

8 “Make una no do as we de do for here today, wey everybody de do anything wey correct for im own eye,* 9 because una never enter the place wey una go rest and get the property wey Jehovah your God de give you. 10 When una don cross River Jordan and don de live for the land wey Jehovah una God de give una to take as una own, e go surely make una get rest from all una enemies wey dey around una and una go dey safe for where una de live. 11 Una go bring everything wey I de command una come the place wey Jehovah una God choose to put im name—una offerings wey them de burn, una sacrifice them, una tithes, the contribution from una hand, and all the vow offerings wey una promise to give Jehovah. 12 Una go de happy for front of Jehovah una God, una and una sons, una daughters, una man and woman slaves, and the Levite for inside una cities* wey them no give share or property among una. 13 Dey careful make you no give your offerings wey them de burn just for any place wey you see. 14 Make you give your offerings wey them de burn only for the place wey Jehovah choose for one of the territories of your tribe, and na for there you go do everything wey I de command you.

15 “But anytime wey you want-am,* you fit kill and chop meat according to the blessing wey Jehovah your God don give you for all your cities.* The person wey no clean and the person wey clean fit chop-am, as you go chop gazelle* or deer. 16 But make una no ever chop the blood; you go pour-am for ground like water. 17 Them no go allow you chop this things for inside your cities:* the tenth part of your grain, your new wine, your oil, the firstborn of your cow and sheep, any of your vow offerings wey you promise to give, your offerings wey your heart move you to give, or the contribution from your hand. 18 You go chop them for front of Jehovah your God for the place wey Jehovah your God go choose—you and your son, your daughter, your man and woman servant, and the Levite for inside your cities;* and you go de happy for front of Jehovah your God for everything wey you de do. 19 Dey careful make you no abandon the Levite as long as you de live for your land.

20 “When Jehovah your God make your territory dey big, just as e don promise you, and you talk say, ‘I want chop meat,’ because you want* chop meat, you fit chop meat anytime wey you want-am.* 21 If the place wey Jehovah your God choose to put im name dey far from you, then make you kill some of your animals, or some of your sheep wey Jehovah don give you, just as I don command you, and make you chop for inside your cities* anytime wey you want-am.* 22 You fit chop-am as you go chop gazelle and deer, both the person wey no clean and the person wey dey clean fit chop-am. 23 Just stand for your decision say you no go chop the blood, because the blood na the life,* and make you no ever chop the life* with the flesh. 24 Make you no ever chop-am, make you pour-am for ground like water. 25 Make you no ever chop-am so that e go better for you and your children wey go come after you, because you de do wetin correct for Jehovah eyes. 26 Make you take only the holy things wey be your own and your vow offerings when you come the place wey Jehovah go choose. 27 Na for there you go give your offerings wey them de burn, the flesh and the blood, ontop the altar of Jehovah your God, and you go pour the blood of your sacrifice them face the altar of Jehovah your God, but you fit chop the flesh.

28 “Make you make sure say you obey all this things wey I de command you, so that e go always better for you and your sons wey go come after you, because you de do wetin good and correct for the eyes of Jehovah your God.

29 “When Jehovah your God destroy the nations wey you go drive comot and you de live for their land, 30 dey careful make you no enter trap after God don destroy them from your front. No ask about their gods say, ‘How this nations be de serve their gods? I go do the same thing too.’ 31 Make you no do this thing to Jehovah your God, because them de do every serious bad thing wey Jehovah hate as them de worship their gods, them de even burn their sons and their daughters for inside fire to their gods. 32 Make una make sure say una do everything wey I de command una. Make una no add anything join-am or remove anything from-am.