Numbers
23 Then Ba′laam tell Ba′lak say: “Build seven altars for this place and prepare seven bulls and seven rams for me.” 2 Quick-quick Ba′lak do just as Ba′laam don talk. And Ba′lak and Ba′laam give bull and ram as offering ontop each of the altar. 3 Then Ba′laam tell Ba′lak say: “Stay for here near your offering wey them de burn, and I go go. Maybe Jehovah go come talk with me. Anything wey e tell me, I go tell you.” So e go one hill wey nothing de grow ontop.
4 Then God talk with Ba′laam, and Ba′laam tell-am say: “I arrange the seven altars for lines and I give bull and ram as offering ontop each of the altar.” 5 Jehovah put this word for Ba′laam mouth: “Go back to Ba′lak, and this one na wetin you go talk.” 6 So e go back and see say Ba′lak and all the leaders of Mo′ab stand near im offering wey them de burn. 7 Then e talk this proverb say:
“Ba′lak the king of Mo′ab don bring me from A′ram,
From the mountains of the east:
‘Come curse Jacob for me.
Yes, come condemn Israel.’
8 How I go curse people wey God no curse?
And how I go condemn people wey Jehovah no condemn?
9 From ontop the rocks I de see them,
And from the hills I de see them.
Na only them de live for there as one group of people;
Them no de count theirself join the nations.
10 Who fit count the children of Jacob wey plenty like sand
Or count even the fourth part of Israel?
Make I* die like the people wey their hand clean,
And make the end of my life be like their own.”
11 Then Ba′lak tell Ba′laam say: “Wetin you don do me? I bring you make you come curse my enemies, and now you no do anything, instead, you bless them.” 12 E answer say: “No be anything wey Jehovah put for my mouth I must talk?”
13 Ba′lak tell-am say: “Abeg, follow me go another place, from where you go fit see them. You go only see some of them, you no go see all of them. Curse them for me from there.” 14 So e carry-am go the open area for Zo′phim, go the top of Pis′gah, and build seven altars and give bull and ram as offering ontop each of the altar. 15 So Ba′laam tell Ba′lak say: “Stay for here near your offering wey them de burn, make I go talk with-am* for that side.” 16 And Jehovah talk with Ba′laam and put this word for im mouth: “Go back to Ba′lak, and this one na wetin you go talk.” 17 So e come meet-am and see say e de wait near im offering wey them de burn, and the leaders of Mo′ab dey with-am. Ba′lak ask-am say: “Wetin Jehovah talk?” 18 Then e talk this proverb say:
“Get up, Ba′lak, and listen.
Hear me, O son of Zip′por.
19 God no be ordinary person wey de lie,
Or son of man wey de change im mind.*
When e talk something, e no go do-am?
When e talk, e no go make-am happen?
20 See! Them call me to come bless;
Now E don bless, and I no fit change-am.
21 E no de allow any magic power against Jacob,
And e no de allow any trouble against Israel.
Jehovah im God dey with them,
And them de use loud voice praise-am as king among them.
22 God de bring them come out from Egypt.
E be like the horns of bush bull for them.
23 And no signs of bad things against Jacob,
Or any demon power against Israel.
This time, them fit talk about Jacob and Israel say:
‘See wetin God don do!’
24 See group of people wey go stand up like lion,
And like lion, e go raise imself up.
E no go lie down until e don chop the animal wey e catch
And drink the blood of the animals wey die.”
25 Then Ba′lak tell Ba′laam say: “If you no fit curse-am at all, then make you no bless-am too.” 26 Ba′laam answer Ba′lak say: “I no tell you say, ‘I go do everything wey Jehovah talk’?”
27 Ba′lak tell Ba′laam say: “Abeg come and allow me make I still carry you go another place, maybe e go dey good for the eye of the true God make you curse the people for me from there.” 28 So Ba′lak carry Ba′laam go ontop Pe′or, wey face Je·shi′mon.* 29 Then Ba′laam tell Ba′lak say: “Build seven altars for this place, and prepare seven bulls and seven rams for me.” 30 So Ba′lak do just as Ba′laam don talk, and e give bull and ram as offering ontop each of the altar.