Leviticus

12 Jehovah continue to tell Moses say: 2 “Tell Israel people say, ‘If woman get belle* and e born boy, the woman no go dey clean for seven days, just as e no dey clean for the days wey e de menstruate. 3 For the eighth day, una go circumcise the pikin.* 4 The woman go continue to make imself dey clean from the blood for the next 33 days. Make e no touch any holy thing, and make e no come inside the holy place until the days wey e go use dey clean don finish.

5 “‘If e born girl, then e no go dey clean for 14 days, just as e go be when e de menstruate. E go continue to make imself dey clean from the blood for the next 66 days. 6 When the days wey e go use dey clean don finish, whether na for son or daughter wey e born, e go bring one young ram wey dey im first year for offering wey them de burn and one young pigeon or one turtledove for sin offering come the domot of the tent of meeting, and give the priest. 7 The priest go bring-am come front of Jehovah and do sacrifice for the woman to make-am dey clean, and the woman go dey clean from the blood wey de comot from im body. This one na the law about the woman wey born boy or girl. 8 But if the woman no fit get sheep, then e must take two turtledoves or two young pigeons, one for offering wey them de burn and one for sin offering, and the priest go do sacrifice for the woman to make-am dey clean, and the woman go dey clean.’”