Deuteronomy

14 “Una be sons of Jehovah una God. Make una no cut unaself or shave una forehead to bald head* for person wey don die. 2 Because una be holy people to Jehovah una God and Jehovah don choose una to be im people, im special property,* from all the people wey dey the earth.

3 “Make you no ever chop anything wey God hate. 4 Na this ones be the animals wey you fit chop: bull, sheep, goat, 5 deer, gazelle, roebuck, bush goat, antelope, bush sheep, and mountain sheep. 6 Una fit chop any animal wey im foot divide to two part and wey de bring back food wey e don swallow to chew-am. 7 But make una no chop this animals wey de bring back wetin them don swallow to chew-am or wey their foot divide: camel, hare,* rock badger,* because them de bring back wetin them don swallow to chew-am but their foot no divide. Them no dey clean for una. 8 And pig, because e get foot wey divide but e no de bring back wetin e don swallow to chew-am. E no dey clean for una. Make una no chop their flesh or touch their dead body.

9 “For everything wey de live for inside water, una fit chop this ones: Anything wey get fins and scales, una fit chop-am. 10 But make una no chop anything wey no get fins and scales. E no dey clean for una.

11 “Una fit chop any bird wey clean. 12 But make una no chop this ones: eagle, osprey bird, black vulture, 13 the red kite, black kite, and every other kind of kite, 14 every kind of raven bird, 15 ostrich, owl, gull bird, every kind of falcon bird, 16 the small owl, the owl wey get long ear, swan bird, 17 pelican bird, vulture, cormorant bird, 18 stork bird, every kind of heron bird, hoopoe bird, and bat. 19 Everything wey get wings and dey for groups* no dey clean for una too. Make una no chop them. 20 Una fit chop anything wey clean wey get wings to fly.

21 “Make una no chop any animal wey una see say e don die. You fit give-am to the stranger wey de live for inside your cities,* and e fit chop-am, or you fit sell-am to stranger. Because una be holy people to Jehovah your God.

“Make you no ever boil young goat for inside im mama milk.

22 “Make you no fail to give the tenth part* of everything wey your seed produce for farm from year to year. 23 You go chop the tenth part of your grain, your new wine, your oil, and the firstborn of your animals and your sheep for front of Jehovah your God for the place wey e choose to put im name, so that you fit learn to fear Jehovah your God everytime.

24 “But if the journey go too long for you and you no fit carry-am go the place wey Jehovah your God don choose as the place wey e put im name because e far from you (because Jehovah your God go bless you), 25 you fit sell-am, and carry the money for your hand, travel go the place wey Jehovah your God go choose. 26 Then you fit use the money buy anything wey you want,* whether na cow, sheep, goat, wine, and other kind of alcohol, or anything wey you like;* and you go chop-am for there for front of Jehovah your God and de happy, you and the people for your house. 27 And make you no abandon the Levite wey dey inside your cities, because them no give-am share or property together with you.

28 “For the end of every three years, make you bring the whole tenth part of wetin your land don produce for that year and keep-am for inside your cities. 29 Then the Levite wey them no give share or property together with you, the stranger wey de live for the land, the pikin wey no get papa,* and the widow wey dey for your cities go come chop belleful, so that Jehovah your God fit bless you for everything wey you de do.