Leviticus

15 Jehovah continue to talk to Moses and Aaron say: 2 “Talk to Israel people and tell them say, ‘If something de come out from the private part* of man, this thing go make the man no clean. 3 E no dey clean, because of the thing wey de come out, whether the thing wey de come out continue to come out from im private part or something block-am, e still no clean.

4 “‘Any bed wey the person wey something de come out from im private part lie down ontop no go dey clean, and anything wey the person sitdown ontop no go dey clean. 5 Any person wey touch the bed of the man must wash im cloths, and e go bath with water, and e no go dey clean till evening. 6 Any person wey sitdown ontop anything wey the man wey something de come out from im private part sitdown ontop, e go wash im cloths, bath with water, and e no go dey clean till evening. 7 Anybody wey touch the flesh of the man wey something de come out from im private part go wash im cloths, bath with water, and e no go dey clean till evening. 8 If the person wey something de come out from im private part spit ontop person wey dey clean, that person must wash im cloths, bath with water, and e no go dey clean till evening. 9 Any seat ontop animal wey the person wey something de come out from im private part sitdown ontop, no go dey clean. 10 Anybody wey de touch anything wey be dey under the man, no go dey clean till evening, and anybody wey carry this things go wash im cloths, bath with water, and e no go dey clean till evening. 11 If the person wey something de come out from im private part no wash im hand with water and e touch person, then that person must wash im cloths, bath with water, and e no go dey clean till evening. 12 Make una scatter any clay container wey the person wey something de come out from im private part don touch, and any container wey them use wood make, make una wash-am with water.

13 “‘When the thing wey de come out from the private part stop and the person dey clean from the thing, then e go count seven days for-am to dey clean, and e must wash im cloths, bath imself for inside water wey them just fetch from river wey de flow, and e go dey clean. 14 For the eighth day, make e take two turtledoves or two young pigeons, and come front of Jehovah for the domot of the tent of meeting, and give them to the priest. 15 And the priest go give them as offering, one as sin offering and the other one as offering wey them de burn, and the priest go do sacrifice for-am for front of Jehovah to get forgiveness for the matter wey concern the thing wey comot from im private part.

16 “‘Now if sperm come out from man body, make e bath im whole body with water, and e no go dey clean till evening. 17 E must use water wash any cloth, and any leather material wey sperm dey ontop, and the thing no go dey clean till evening.

18 “‘When man sleep with woman and sperm come out from im body, make them bath with water, and them no go dey clean till evening.

19 “‘If blood de come out from woman body, the woman no go dey clean because of the menstruation for seven days. Anybody wey touch the woman no go dey clean till evening. 20 Anything wey the woman lie down ontop when the woman no dey clean because of im menstruation, the thing no go dey clean, and everything wey e sitdown ontop no go dey clean. 21 Anybody wey touch the woman bed go wash im cloths, go bath with water, and e no go dey clean till evening. 22 Anybody wey touch anything wey the woman sitdown ontop go wash im cloths, e go bath with water, and e no go dey clean till evening. 23 If anybody touch the bed or another thing wey the woman sitdown ontop, e no go dey clean till evening. 24 And if man sleep with woman and the blood of the woman menstruation touch the man, then the man no go dey clean for seven days, and any bed wey the man lie down ontop no go dey clean.

25 “‘When blood de comot from woman body for many days and no be the normal time for the woman menstruation, or if the days wey the blood de comot from the woman body long pass the normal days of im menstruation, the woman no go dey clean for all the days wey the blood de comot from im body, just as e de be for the days wey e no dey clean because of im menstruation. 26 Any bed wey the woman lie down ontop for the days wey blood de comot from im body, no go dey clean, just like the bed wey e lie down ontop for im menstruation, and anything wey e sitdown ontop no go dey clean, just as e de be for im menstruation. 27 Anybody wey touch them no go dey clean, and e must wash im cloths, bath with water, and e no go dey clean till evening.

28 “‘But when the thing wey de comot from the woman body don stop,* e go count seven days, and after the seven days, e go dey clean. 29 For the eighth day, the woman go take two turtledoves or two young pigeons and bring them give the priest for the domot of the tent of meeting. 30 The priest go use one for sin offering and the other one for offering wey them de burn, and the priest go do sacrifice for the woman for front of Jehovah to get forgiveness for the matter wey concern the thing wey no clean wey comot from im body.

31 “‘So una must keep Israel people separate make them dey clean. If them no continue to dey clean, them go dirty my tabernacle wey dey among them, and them go die because of this one.

32 “‘This one na the law about man wey something de comot from im body, man wey no clean because sperm comot from im body, 33 about woman wey no clean because of im menstruation, any man or woman wey something de comot from im body, and man wey sleep with woman wey no clean.’”