Deuteronomy

23 “No man wey them damage the seeds for im private part to castrate-am or man wey them don cut im private part comot fit enter inside the congregation of Jehovah.

2 “Make the son wey man and woman wey no marry born, no enter inside the congregation of Jehovah. Even go reach the tenth generation, nobody among im children-children fit enter inside the congregation of Jehovah.

3 “Make no Am′mon person or Mo′ab person enter inside the congregation of Jehovah. Even go reach the tenth generation, nobody among their children-children go ever enter inside the congregation of Jehovah, 4 because them no come help una with food and water when una dey road de comot from Egypt, and because them hire Ba′laam the son of Be′or from Pe′thor wey dey Mes·o·po·ta′mi·a to curse* you. 5 But Jehovah your God no gree listen to Ba′laam. Instead, Jehovah your God change the curse to blessing for you, because Jehovah your God love you. 6 For all your life, make you no ever do anything for their good or anything wey go make them gain.

7 “Make you no hate E′dom person because na your brother.

“Make you no hate Egypt person because you don live as stranger for im country before. 8 The third generation of children wey them born for them fit enter the congregation of Jehovah.

9 “When you don set your camp to fight your enemies, make you no put hand for any bad thing.* 10 If man no dey clean because of sperm wey come out from im body for night, make e go outside the camp and no come back inside the camp. 11 When evening reach, make e wash imself with water, and then e fit come back to the camp when sun don go down. 12 Make you get separate place* wey you don choose for outside the camp, and na there you go go. 13 Make you carry stick* as part of your tool. When you bend down for outside to shit, make you use-am dig hole and then make you cover-am. 14 Because Jehovah your God de waka for inside your camp to save you and to put your enemies for your hand, and your camp must dey holy, so that e no go see any dirty thing for your camp and stop to follow you.

15 “Make you no give any slave back to im oga when e run leave im oga come meet you. 16 E fit stay among your people for any place wey e choose for inside one of your cities, any place wey e like. Make you no treat-am anyhow.

17 “Make no daughter of Israel people be temple prostitute, and make no son of Israel people be temple prostitute too. 18 Make you no bring things wey them pay woman prostitute or things wey them pay man prostitute* come inside the house of Jehovah your God to do wetin you don promise, because the two na something wey Jehovah your God really hate.

19 “Make you no make your brother pay interest, whether na interest for money, for food, or for anything wey you fit ask for interest. 20 You fit make stranger pay interest, but make you no make your brother pay interest, so that Jehovah your God fit bless you for everything wey you de do for the land wey you go take as your own.

21 “If you make promise to Jehovah your God, make you no dey slow to pay-am. Because Jehovah your God go surely ask you to pay-am; if you no do like that, this one go be sin for you. 22 But if you no make promise, sin no go dey your head. 23 Make you do wetin you talk say you go do, and you must do wetin your own mouth don promise as offering wey you de give from your heart to Jehovah your God.

24 “If you enter your neighbor vine farm, you fit chop grapes belleful as you* like, but make you no carry any one put for your container.

25 “If you go your neighbor farm wey get grain wey them never cut,* you fit pluck the ripe ones with your hand, but make you no use farm knife* cut your neighbor grain.