Leviticus
22 Jehovah still tell Moses say: 2 “Tell Aaron and im sons say make them dey careful about how them de handle* the holy things of Israel people wey them de make holy to me, so that them no go spoil my holy name. I be Jehovah. 3 Tell them say, ‘For all una generations, any of una pikin wey come near the holy things wey Israel people make holy to Jehovah when the person no dey clean, make una kill* that person* comot from my front. I be Jehovah. 4 Make no man from Aaron children wey get leprosy or wey something de comot from im private part chop from the holy things until e don clean, or man wey touch person wey no dey clean because of person wey don die,* or man wey sperm de comot from im private part, 5 or man wey touch any of the small-small animals wey no clean wey dey for group, or wey touch man wey no clean because of any reason and wey fit make-am no clean. 6 The person* wey touch any of this things no go dey clean till evening and no go chop any of the holy things, but make e bath with water. 7 When the sun don come down, e go dey clean, and after that one, e fit chop some of the holy things because na im food. 8 And, make e no chop any animal wey them see when e don already die, or anything wey bush animals tear and no come dey clean because of-am. I be Jehovah.
9 “‘Them must continue to do everything wey I don talk so that them no go put sin for their head because of-am and die because of-am, because them de make-am no dey holy. I be Jehovah wey de make them holy.
10 “‘Make person wey no get the right* no chop anything wey dey holy. Make stranger wey come visit the priest or person wey them hire to do work no chop anything wey dey holy. 11 But if priest buy person* with im own money, that person fit join chop-am. Slaves wey them born for im house fit still join chop im food. 12 If the daughter of priest marry person wey no be priest,* make e no chop from the contribution of the holy things. 13 But if the husband of the daughter of priest die, or im husband divorce-am and them no get pikin, and e go back to im papa house like when e dey young, e fit chop some of im papa food; but make person wey no get the right* no chop-am.
14 “‘Now if person chop holy thing by mistake, e must add one-fifth of the value of the holy thing and give the holy offering to the priest. 15 So make them no make the holy things of Israel people, wey them contribute to Jehovah no dey holy 16 and bring punishment to the people for the bad thing wey dey their head because them chop their holy things; because I be Jehovah wey de make them holy.’”
17 Jehovah continue to talk to Moses say: 18 “Talk to Aaron and im sons and all Israel people and tell them say, ‘When Israel person or stranger wey de live for Israel give offering wey them de burn to Jehovah to do the things wey e promise or to make offering wey person de give from im heart, 19 make e give male animal wey well for body, the young rams or the goats, so that God go accept-am. 20 Make una no ever bring anything wey no complete for body, because e no go make God accept una.
21 “‘If person bring peace sacrifice to Jehovah to do the thing wey e don promise or as offering wey person de give from im heart, make e be animal wey well for body, from among cow or goat or sheep, so that God go accept-am. Make e no get any problem for body at all. 22 Make no animal offering dey blind, get bone wey break, get sore, boil, craw-craw, or ringworm for body; make una no ever bring any of this things to Jehovah or make this kind offering ontop the altar for Jehovah. 23 You fit bring bull or sheep wey one leg long pass the other one or short pass the other one as offering wey person de give from im heart, but I no go accept-am as vow offering.* 24 Make una no ever give Jehovah the one wey the seeds for im private part get problem or e scatter or them draw-am comot or cut-am comot. Make una no give this kind animals as offerings for una land. 25 And make una no ever bring any of this kind things wey una collect from the hand of strangers as the bread of una God, because them don spoil and part of their body no complete. God no go accept them from una.’”
26 Jehovah still talk to Moses say: 27 “When them born bull or young ram or goat, e go continue to dey with im mama for seven days, but from the eighth day, God go accept-am as offering, offering wey them make with fire to Jehovah. 28 As for bull or sheep, make una no ever kill-am with im small pikin for the same day.
29 “If una de sacrifice to Jehovah, sacrifice wey them de use thank God, make una sacrifice-am for way wey go make God accept una. 30 Make una chop-am that day. Make una no ever leave any of-am till morning. I be Jehovah.
31 “Una must continue to obey my commandments and do them. I be Jehovah. 32 Make una no ever spoil my holy name, and I must dey holy for the eyes of Israel people. I be Jehovah wey de make una dey holy, 33 the person wey de bring una come out from the land of Egypt to show say I be una God. I be Jehovah.”