Numbers

5 Jehovah still talk to Moses say: 2 “Command Israel people to send anybody wey get leprosy comot from the camp and anybody wey something de come out from im private part, and anybody wey no dey clean because e touch dead body.* 3 Whether na man or woman, make una send-am comot. Make una send-am go outside the camp so that e no go make the camps of the people wey I dey* among them no dey clean.” 4 So, Israel people do like that and send them go outside the camp. Just as Jehovah don tell Moses, na so Israel people do.

5 Jehovah continue to talk to Moses say: 6 “Tell Israel people say, ‘If any man or woman do any of the sins wey people de do and do wetin show say e no dey faithful to Jehovah, the sin go dey the person* head. 7 E* must confess the sin wey e don* do and return the complete amount as payment for im sin and e go still add one fifth of the value; e go give-am to the person wey e do bad to. 8 But if the person wey them do bad thing to, no get close family member wey go receive the payment, make them return-am to Jehovah and e go be the priest own, together with* the ram wey them go give the priest wey e go use do sacrifice for the sin of the person.

9 “‘All the holy contribution wey Israel people give to the priest go be im own. 10 The holy things of each person go continue to be im* own. Anything wey each person give the priest, that thing go be the priest own.’”

11 Jehovah continue to talk to Moses say: 12 “Talk to Israel people and tell them say, ‘This na wetin go happen if person wife do wetin no correct and no dey faithful to im husband 13 and another man sleep with the woman but im husband no know and nobody don know and this one make-am dirty imself, but nobody dey to talk wetin e see about the woman and them never catch-am: 14 Whether the husband start to jealous and suspect im wife say e no dey faithful when e don dirty imself or whether e start to jealous and suspect im wife say e no dey faithful when e no dirty imself, 15 the man must bring im wife to the priest, together with offering for the wife, one tenth of one e′phah* of barley flour. Make e no pour oil ontop-am, or put frankincense ontop-am, because na grain offering of jealousy, na grain offering to show whether person do bad.

16 “‘The priest go bring the woman come front and make-am stand for front of Jehovah. 17 The priest go take holy water from inside clay container and the priest go take some of the sand from the ground for the tabernacle and put-am inside the water. 18 And the priest go make the woman stand for front of Jehovah and comot the woman headtie from im head, and put the grain offering wey de show whether person don do bad for the woman hand, wey be, the grain offering of jealousy, and the bitter water wey de bring curse go dey for the priest hand.

19 “‘Then the priest go make the woman swear and e go tell the woman say: “If no other man don sleep with you when you dey under the authority of your husband, and you no do something wey no correct and dirty yourself, make you dey free from the result of this bitter water wey de bring curse. 20 But if you don do wetin no correct when you dey under the authority of your husband as you dirty yourself and you don sleep with another man apart from your husband—” 21 Then the priest go make the woman to swear words wey get curse and the priest go tell the woman say: “Make Jehovah make you be example wey your people de use when them de curse and de swear, as Jehovah make your lap* fall comot* and make your belle swell. 22 This water wey de bring curse go enter inside your intestines to make your belle swell and make your lap* fall comot.”* Then the woman go talk say: “Amen! Amen!”*

23 “‘Then the priest go write this curse them for inside the book and wash them put for inside the bitter water. 24 Then e go make the woman drink the bitter water wey de bring curse, and the water wey de bring curse go enter inside the woman and produce bitter thing. 25 And make the priest take the grain offering for jealousy from the woman hand and wave the grain offering go back and front for front of Jehovah and e go bring-am near the altar. 26 The priest go take one full hand of the grain offering as something wey stand for the whole offering, and e go burn-am to make smoke comot from ontop the altar, and after e go make the woman drink the water. 27 When e make the woman drink the water, if the woman don dirty imself and do wetin show say e no dey faithful to im husband, then the water wey de bring curse go enter inside the woman and e go be something wey dey bitter and the woman belle go swell up and im lap* go fall comot,* and the woman people go use the woman as example when them de curse. 28 But if the woman no dirty imself and e dey clean, then e go dey free from that kind punishment and e go fit get belle and born pikin.

29 “‘This one na the law about jealousy, when woman no do the correct thing and e dirty imself when e dey under im husband authority, 30 or about man wey start to jealous and de suspect im wife say e no dey faithful. Make e make im wife stand for front of Jehovah, and the priest must follow all this law for the matter wey concern the woman. 31 The man go dey free, but im wife go answer for the bad thing wey e do.’”