Deuteronomy

27 Then Moses together with the elders of Israel command the people say: “Make una obey every commandment wey I de give una today. 2 And when the day don reach wey una go cross River Jordan to enter the land wey Jehovah your God de give you, make una arrange big-big stones and cover them with plaster.* 3 Then make you write all the words of this Law ontop them when you don cross go the other side, so that you fit enter the land wey Jehovah your God de give you, land wey milk and honey de flow for inside, just as Jehovah, the God of your papa-papa them, don promise you. 4 When una don cross River Jordan, make una arrange this stones ontop Mount E′bal and cover them with plaster,* just as I de command you today. 5 Make you still build altar for there to Jehovah your God, altar wey them make with stones. Make you no use iron tools for this stones. 6 Make you build the altar of Jehovah your God with stones wey them never cut and do offerings wey them de burn to Jehovah your God ontop-am. 7 Make you do peace sacrifice them and chop them for there, and you go de happy for front of Jehovah your God. 8 And make you write all the words of this Law ontop the stones make e dey clear.”

9 Then Moses and the Levites wey be priests tell all Israel people say: “Dey quiet and listen, O Israel. Today, una don be the people of Jehovah your God. 10 You must listen to the things wey Jehovah your God de talk, and obey im commandments and im laws wey I de command you today.”

11 That day Moses command the people say: 12 “Na this tribes go stand ontop Mount Ger′i·zim to bless the people when una don cross River Jordan: Sim′e·on, Le′vi, Judah, Is′sa·char, Joseph, and Benjamin. 13 And na this ones go stand ontop Mount E′bal to talk the curse: Reu′ben, Gad, Ash′er, Zeb′u·lun, Dan, and Naph′ta·li. 14 And the Levites go use loud voice answer everybody for Israel say:

15 “‘Curse go follow the person wey make image wey them carve or wey make image with metal,* something wey be serious bad thing to Jehovah, the handwork of person wey sabi use hand make things,* and wey don hide-am.’ (And all the people go answer say, ‘Amen!’*)

16 “‘Curse go follow the person wey de treat im papa or im mama like nothing.’ (And all the people go talk say, ‘Amen!’)

17 “‘Curse go follow the person wey move im neighbor boundary mark.’ (And all the people go talk say, ‘Amen!’)

18 “‘Curse go follow the person wey make blind person miss road.’ (And all the people go talk say, ‘Amen!’)

19 “‘Curse go follow the person wey bend the judgment of stranger wey de live for the land, pikin wey no get papa,* or widow.’ (And all the people go talk say, ‘Amen!’)

20 “‘Curse go follow the person wey sleep with im papa wife, because e don disgrace im papa.’* (And all the people go talk say, ‘Amen!’)

21 “‘Curse go follow the person wey sleep with any animal.’ (And all the people go talk say, ‘Amen!’)

22 “‘Curse go follow the person wey sleep with im sister, wey be the daughter of im papa or the daughter of im mama.’ (And all the people go talk say, ‘Amen!’)

23 “‘Curse go follow the person wey sleep with im mother-in-law.’ (And all the people go talk say, ‘Amen!’)

24 “‘Curse go follow the person wey hide wait for im neighbor and kill-am.’ (And all the people go talk say, ‘Amen!’)

25 “‘Curse go follow the person wey collect bribe to kill* innocent person.’* (And all the people go talk say, ‘Amen!’)

26 “‘Curse go follow the person wey no support and obey the things wey this Law talk.’ (And all the people go talk say, ‘Amen!’)