The Second of Kings
14 For the second year of Je·ho′ash wey be the son of Je·ho′a·haz the king of Israel, Am·a·zi′ah the son of Je·ho′ash wey be king of Judah start to rule as king. 2 E dey 25 years when e start to rule as king, and e rule for 29 years for Jerusalem. Im mama name na Je·ho·ad′din wey come from Jerusalem. 3 E continue to do wetin correct for Jehovah eyes, but e no do like David wey be im papa-papa. E do everything the way im papa Je·ho′ash do-am. 4 But, the high place* them be still dey and the people still de do sacrifice and de make sacrifice smoke ontop the high place them. 5 As e just get power well-well as king of the kingdom, e kill im servants wey be kill im papa the king. 6 But e no kill the sons of the people wey kill im papa, just as e dey for Jehovah commandment wey them write for the book wey Moses Law dey, say: “Make them no kill papa them because of their sons, and make them no kill sons because of their papa them; but make them kill each person because of im own sin.” 7 E kill E′dom people wey be dey the Lowland* of Salt, na 10,000 men e kill, and e take over Se′la for the war, the name of the place come be Jok′the·el till today.
8 Then Am·a·zi′ah send messengers go meet Je·ho′ash the son of Je·ho′a·haz wey be the son of Je′hu the king of Israel. E talk say: “Come make we fight war with each other.”* 9 Je·ho′ash wey be king of Israel send this message to Am·a·zi′ah wey be king of Judah say: “One chuku-chuku grass for Leb′a·non send message to the cedar wey dey Leb′a·non say, ‘Give your daughter to my son make e marry-am.’ But one wicked animal for Leb′a·non wey de waka pass, march the chuku-chuku grass for ground. 10 Na true say you destroy E′dom people, this one come de make you carry shoulder. Make you happy because of the praise wey you don get, but make you stay for your own house.* Why you go do wetin go cause serious trouble for you and make you fall, and make Judah fall like you too?” 11 But Am·a·zi′ah no hear word.
So Je·ho′ash wey be king of Israel go up and e fight war with Am·a·zi′ah wey be king of Judah for Beth-she′mesh wey dey the land of Judah. 12 Israel people win Judah people, so each of them run go im house.* 13 For Beth-she′mesh, Je·ho′ash wey be king of Israel catch Am·a·zi′ah the king of Judah, wey be the son of Je·ho′ash, the son of A·ha·zi′ah. Then them come Jerusalem and e break some part of the wall for Jerusalem, from the Gate of E′phra·im go reach the Corner Gate, the place reach 400 cubits.* 14 E carry all the gold and the silver, and all the things wey them see for the house of Jehovah and for the place wey them de keep better-better things for the house* of the king, e still carry people. Then e go back to Sa·mar′i·a.
15 As for the other story about Je·ho′ash, wetin e do, how e get power reach and how e fight Am·a·zi′ah wey be king of Judah, them no write-am for the book wey talk about the things wey happen for the time of Israel kings? 16 Then Je·ho′ash die like im papa-papa them, and them bury-am for Sa·mar′i·a, for the place wey them bury the kings of Israel. Im son Jer·o·bo′am come start to rule as king after-am.
17 Am·a·zi′ah the son of Je·ho′ash wey be the king of Judah still live for 15 years after Je·ho′ash the son of Je·ho′a·haz wey be the king of Israel don die. 18 As for the other story about Am·a·zi′ah, them no write-am for the book wey talk about the things wey happen for the time of Judah kings? 19 After, them make wicked plan against-am for Jerusalem, e come run go La′chish, but them send people follow-am go La′chish and them kill-am for there. 20 So them use horse them carry-am come back, and them bury-am with im papa-papa them for Jerusalem for the City of David. 21 Then all Judah people carry Az·a·ri′ah* wey dey 16 years and make-am king to rule after Am·a·zi′ah wey be im papa. 22 E build E′lath again and make-am the city of Judah again after the king* don die like im papa-papa them.
23 For the 15th year of Am·a·zi′ah wey be the son of Je·ho′ash the king of Judah, Jer·o·bo′am the son of Je·ho′ash wey be king of Israel start to rule as king for Sa·mar′i·a, and e rule for 41 years. 24 E continue to do wetin bad for Jehovah eyes. E no stop to commit all the sins wey Jer·o·bo′am the son of Ne′bat make Israel people commit. 25 E make Israel boundary dey where e dey before, from Le′bo-ha′math* go reach the Sea of Ar′a·bah, just as Jehovah the God of Israel talk. E use Im servant Jo′nah the son of A·mit′tai, wey be prophet from Gath-he′pher talk-am. 26 Because Jehovah be don see the serious suffer wey Israel people de suffer. Nobody be dey to help Israel people, even the people wey no fit help theirself or the people wey dey weak be no dey again. 27 But Jehovah be don promise say e no go wipe the name of Israel from the earth. So e use Jer·o·bo′am the son of Je·ho′ash save them.
28 As for the other story about Jer·o·bo′am, everything wey e do, how e get power reach, how e fight and how e make Judah people for Israel collect Damascus and Ha′math back, them no write-am for the book wey talk about the things wey happen for the time of Israel kings? 29 Then Jer·o·bo′am die, and them bury-am with im papa-papa them, wey be, the kings of Israel. And im son Zech·a·ri′ah start to rule as king after-am.