Numbers
25 When Israel be de stay for Shit′tim, the people start to put hand for sex wey no clean with the daughters of Mo′ab. 2 The women invite the people to join them when them de do sacrifice to their gods, and the people start to chop and bow down to their gods. 3 So Israel join for the worship of* Ba′al of Pe′or, and Jehovah vex for Israel no be small. 4 Jehovah tell Moses say: “Take all the leaders* of this people and hang them for front of Jehovah for daytime make people see,* so that me, Jehovah, fit stop to vex for Israel.” 5 Then Moses tell the judges of Israel say: “Make each of una kill im men wey join for the worship of* Ba′al of Pe′or.”
6 But just that time, one Israel man de bring one Mid′i·an woman come near im brothers for front of Moses and all Israel people, as them de cry for the domot of the tent of meeting. 7 When Phin′e·has the son of El·e·a′zar the son of Aaron the priest see-am, quick-quick, e get up from where the people dey and carry one spear* for im hand. 8 Then e follow the man of Israel enter inside the tent and chuk the two of them pass through their body, both the man of Israel and the woman through the woman private parts. So the punishment wey de affect Israel people stop. 9 The number of people wey die from the punishment na 24,000.
10 Then Jehovah tell Moses say: 11 “Phin′e·has the son of El·e·a′zar the son of Aaron the priest don make me stop to vex for the people of Israel because e no allow anybody among them to dey against me. Na that one make me never destroy Israel people, even though say I want make people worship only me. 12 So, make you talk say, ‘I de make my agreement of peace with-am. 13 And this one go be agreement for-am and im children wey go come after-am to serve as priest for long time, because e no allow anybody to dey against im God and e help the people of Israel to get forgiveness.’”
14 And e come be say, the name of the Israel man wey them kill together with the Mid′i·an woman na Zim′ri the son of Sa′lu, wey be chief of family group from im papa side, from people wey come from the tribe of Sim′e·on. 15 The name of the Mid′i·an woman wey them kill na Coz′bi the daughter of Zur; the man na leader of the family groups of one family from the papa side for Mid′i·an.
16 After, Jehovah tell Moses say: 17 “Trouble Midʹi·an people and kill them, 18 because them don de give una trouble with the cunning-cunning way wey them de do things against una for the matter wey concern Pe′or and Coz′bi, the daughter of one chief for Mid′i·an, their sister wey them kill for the day wey the people face punishment about the matter of Pe′or.”