Mark

2 But, after some days, e enter Ca·per′na·um again, the news come spread say e don dey house. 2 And plenty-plenty people gather around the place sotey space no dey again, even around the door, and e start to preach the word of God to them. 3 And them bring one person wey no de fit move im body come meet-am, and na four men carry-am. 4 But them no fit carry-am reach where Jesus dey because of the plenty people wey full there, so them come remove the roof ontop where Jesus dey, and after them don make one big hole, them sofri bring the bed* wey the person lie down ontop come down. 5 When Jesus see the kind faith wey them get, e come tell the person wey de sick say: “My pikin, I don forgive your sins.” 6 That time, some scribes be dey there wey sitdown and de think for their heart say: 7 “Why this man de talk like this? E de talk against God. Who fit forgive sins apart from God?” 8 But at once, Jesus just know for im mind say them de reason like that among theirself, so e ask them say: “Why una de think like that for una heart? 9 Which one easy pass, to tell this person wey no fit move im body say, ‘I don forgive your sins,’ or to talk say, ‘Stand up, carry your bed and waka’? 10 But so that una go know say the Son of man get authority to forgive sins for earth, e come tell the person wey no fit move im body say: 11 “I de tell you say, Stand up, carry your bed and go your house.” 12 So e stand up, and at once, e carry im bed, and waka comot for front of all of them. This one make all of them surprise no be small, and them praise God, de talk say: “We never see anything like this before.”

13 E come go near the sea again, and all the plenty people just de come meet-am, and e start to teach them. 14 And as e de pass, e see Le′vi wey be the son of Al·phae′us wey sitdown for office wey them de pay tax, e come tell-am say: “Come de follow me.” Na so e just stand up and follow-am. 15 After, as e de chop* for Le′vi house, plenty people wey de collect tax and sinners come de chop* with-am and im disciples, because many of them de follow-am. 16 But when the scribes* wey be Pharisee people see say e de chop with sinners and people wey de collect tax, them come de ask im disciples say: “E de chop with people wey de collect tax and sinners?” 17 When Jesus hear this one, e come tell them say: “People wey their body strong no need doctor, but people wey de sick need-am. No be righteous people* I come call, but na sinners.”

18 That time, the disciples of John and the disciples of the Pharisee people de normally fast, so them come meet-am and ask-am say: “Why the disciples of John and the disciples of the Pharisee people de fast, but your disciples no de fast?” 19 Jesus come tell them say: “The friends of the man wey de marry no get any reason to fast as e dey with them, or them get? As the man wey de marry dey with them, them no fit fast. 20 But time de come wey them go carry the man wey de marry comot leave them. Na that time them go fast. 21 Nobody de take pieces of new cloth patch old cloth.* If e do like that, the new cloth go pull comot from the old one, the hole wey dey there go come big pass as e dey before. 22 Another thing be say, nobody de pour new wine inside old wine bags wey them use animal skin make. If e do like that, the wine go burst the bags, then the wine go pour troway and the bags go spoil, but na inside new wine bags them de put new wine.

23 Now, for Sabbath day, as e de pass farm wey them plant things,* im disciples come start to pluck some of the things for the farm as them de pass. 24 So the Pharisee people tell-am say: “See wetin them de do! Why them de do wetin them no suppose do for Sabbath day?” 25 But e ask them say: “Una never read wetin David do when e no get food, when e and the men wey dey with-am de hungry? 26 For the story about A·bi′a·thar wey be chief priest, una no read about how David enter the house of God and chop the bread wey them put as offering to God,* something wey nobody get the right to chop except the priests, and e still give some to the men wey dey with-am?” 27 Then e tell them say: “God arrange the Sabbath because of people, no be say e make people because of Sabbath. 28 So the Son of man na the Lord of even the Sabbath.”