Joshua

21 Then the heads of the family groups of the Levites from their papa side come meet El·e·a′zar the priest, Joshua the son of Nun, and the heads of the family groups from their papa side from the tribes of Israel, 2 and them come tell them for Shi′loh for the land of Ca′naan, say: “Jehovah command through Moses say make them give us cities wey we go stay, together with their lands wey get grass for our animals.” 3 So as Jehovah command, Israel people give the Levites this cities and the lands wey get grass for there from their own property.

4 The lot fall for the families of Ko′hath, and them use lot give* the Levites wey be children-children of Aaron the priest 13 cities from the tribe of Judah, the tribe of Sim′e·on, and the tribe of Benjamin.

5 And for the rest of the people wey come from the family of Ko′hath, na ten cities them share for* them from the families of the tribe of E′phra·im, the tribe of Dan, and the half tribe of Ma·nas′seh.

6 And for Ger′shon people, them share 13 cities for them from the families of the tribe of Is′sa·char, the tribe of Ash′er, the tribe of Naph′ta·li, and the half tribe of Ma·nas′seh for Ba′shan.

7 For Me·rar′i people, them give them 12 cities from the tribe of Reu′ben, the tribe of Gad, and the tribe of Zeb′u·lun, according to their families.

8 So Israel people use lot give the Levites this cities and their lands wey get grass just as Jehovah don command through Moses.

9 So this na the names of the cities wey them give them from the tribe of Judah and the tribe of Sim′e·on, 10 and them give them to the sons of Aaron wey come from the families of Ko′hath wey be the Levites, because the first lot fall for them. 11 Them give them Kir′i·ath-ar′ba (Ar′ba na the papa of A′nak), wey be, Heb′ron, for the area wey mountains dey for Judah and the lands wey grass dey wey surround-am. 12 But them give the land wey dey the city and the village them to Ca′leb the son of Je·phun′neh as im own property.

13 And to the sons of Aaron the priest, them give them the city of protection for person wey kill another person, and the name of the city na, Heb′ron together with the lands wey get grass, them still give them Lib′nah together with the lands wey get grass, 14 Jat′tir together with the lands wey get grass, Esh·te·mo′a together with the lands wey get grass, 15 Ho′lon together with the lands wey get grass, De′bir together with the lands wey get grass, 16 A′in together with the lands wey get grass, Jut′tah together with the lands wey get grass, and Beth-she′mesh together with the lands wey get grass—nine cities from this two tribes.

17 And from the tribe of Benjamin: Gib′e·on together with the lands wey get grass, Ge′ba together with the lands wey get grass, 18 An′a·thoth together with the lands wey get grass, and Al′mon together with the lands wey get grass—four cities.

19 All the cities wey them give the children-children of Aaron wey be the priests, na 13 cities together with their lands wey get grass.

20 And them use lot give cities from the tribe of E′phra·im to the rest of the people wey come from the families of Ko′hath among the Levites. 21 Them give them the city of protection for person wey kill another person, and the name of the city na She′chem together with the lands wey get grass for the area wey mountains dey for E′phra·im, them still give them Ge′zer together with the lands wey get grass, 22 Kib′za·im together with the lands wey get grass, and Beth-ho′ron together with the lands wey get grass—four cities.

23 And from the tribe of Dan: El′te·ke together with the lands wey get grass, Gib′be·thon together with the lands wey get grass, 24 Ai′ja·lon together with the lands wey get grass, Gath-rim′mon together with the lands wey get grass—four cities.

25 And from the half tribe of Ma·nas′seh: Ta′a·nach together with the lands wey get grass and Gath-rim′mon together with the lands wey get grass—two cities.

26 All the cities together with their lands wey get grass wey them give the rest of the people wey come from the families of Ko′hath na ten.

27 And from the half tribe of Ma·nas′seh, them give Ger′shon people wey come from the families of the Levites the city of protection for person wey kill another person, and the name of the city na, Go′lan, wey dey Ba′shan, together with the lands wey get grass and them still give them Be·esh′te·rah together with the lands wey get grass—two cities.

28 And from the tribe of Is′sa·char: Kish′i·on together with the lands wey get grass, Dab′e·rath together with the lands wey get grass, 29 Jar′muth together with the lands wey get grass, and En-gan′nim together with the lands wey get grass—four cities.

30 And from the tribe of Ash′er: Mi′shal together with the lands wey get grass, Ab′don together with the lands wey get grass, 31 Hel′kath together with the lands wey get grass, and Re′hob together with the lands wey get grass—four cities.

32 And from the tribe of Naph′ta·li: the city of protection for the person wey kill another person, na, Ke′desh wey dey Gal′i·lee together with the lands wey get grass, them still give them Ham′moth-dor together with the lands wey get grass, and Kar′tan together with the lands wey get grass—three cities.

33 All the cities of Ger′shon people according to their families na 13 cities together with their lands wey get grass.

34 And from the tribe of Zeb′u·lun them give the families of Me·rar′i wey be the rest of the Levites: Jok′ne·am together with the lands wey get grass, Kar′tah together with the lands wey get grass, 35 Dim′nah together with the lands wey get grass, and Na·hal′al together with the lands wey get grass—four cities.

36 And from the tribe of Reu′ben: Be′zer together with the lands wey get grass, Ja′haz together with the lands wey get grass, 37 Ked′e·moth together with the lands wey get grass, and Meph′a·ath together with the lands wey get grass—four cities.

38 And from the tribe of Gad: the city of protection for the person wey kill another person na, Ra′moth wey dey Gil′e·ad together with the lands wey get grass, them still give them Ma·ha·na′im together with the lands wey get grass, 39 Hesh′bon together with the lands wey get grass, and Ja′zer together with the lands wey get grass—altogether na four cities.

40 All the cities wey them share for Me·rar′i people according to their families, wey be the rest of the families of the Levites, na 12 cities.

41 All the cities of the Levites wey dey inside the property of Israel people na 48 cities together with their lands wey get grass. 42 Each of this cities get lands wey get grass round-am and na so e be for all this cities.

43 So Jehovah give Israel people all the land wey e don swear say e go give their papa-papa them, and them take-am as their own and live for inside. 44 Another thing be say, Jehovah make them rest for every corner just as e don swear to their papa-papa them, and nobody among all their enemies fit stand against them. Jehovah put all their enemies for their hand. 45 No single promise* out of all the better promise them wey Jehovah don make with the house of Israel fail; all of them happen.