Numbers
17 Jehovah come tell Moses say: 2 “Talk to Israel people and take one stick from them for each family group from their papa side, from the chiefs of each family group from their papa side, na 12 sticks all of them go be. Write the name of each one of them ontop im stick. 3 Make you write Aaron name ontop Le′vi stick, because na one stick dey for the head of each family group from their papa side. 4 Put the sticks for inside the tent of meeting for front of the Testimony, where I de always show myself to una. 5 And the stick of the man wey I choose go start to grow flowers, and I go stop the complain wey Israel people de complain against me wey them still de complain against una.”
6 So Moses talk to Israel people, and all their chiefs give-am sticks—one stick for each chief of im family group from im papa side, 12 sticks—and Aaron stick dey among their sticks. 7 Then Moses put the sticks for front of Jehovah for inside the tent of the Testimony.
8 The next day, when Moses go inside the tent of the Testimony, see! Aaron stick wey be for the family of Le′vi don start to grow flowers and continue to bring out flowers, and the flowers continue to grow and de produce ripe almond fruits. 9 Then Moses bring out all the sticks from front of Jehovah to all the people of Israel. Them look the sticks and each man take im own stick.
10 Then Jehovah tell Moses say: “Put Aaron stick back for front of the Testimony, as something wey una go keep as sign to children wey de do strong head, so that their complain against me fit stop and so that them no go die.” 11 Quick-quick, Moses do just as Jehovah don command-am. Na so e just do.
12 Then Israel people tell Moses say: “Now we go die, we go surely die finish, all of us go die finish! 13 Anybody wey even come near Jehovah tabernacle go die! Na like that we go die?”