Exodus

39 Them use the blue thread, the purple wool, and the red material to make cloths wey them really weave well, wey them go de use do work for the holy place. Them make the holy cloths for Aaron, just the way Jehovah don command Moses.

2 E make the eph′od with gold, blue thread, purple wool, red material, and quality linen wey them twist. 3 Them use hammer nack the gold to make-am thin and flat, and e cut-am as threads to weave-am together with the blue thread, the purple wool, the red material, and the quality linen, and weave design ontop-am. 4 Them make pieces ontop the shoulders for the eph′od wey join, and join them for the two edges. 5 As for the belt* wey them weave, wey them de tie ontop the eph′od to make-am stay well for im position, them make-am with the same material wey be gold, blue thread, purple wool, red material, and quality linen wey them twist, just the way Jehovah don command Moses.

6 Then, them put the onyx stones inside things wey them de use hold something wey them make with gold, and them write the names of the sons of Israel inside them, the same way them de write for inside stamp. 7 E put them ontop the shoulder part of the eph′od as stones wey them go de use remember the sons of Israel, just the way Jehovah don command Moses. 8 Then e make the breastpiece just like person wey sabi design things for cloth de do, just like the eph′od. E make-am with gold, blue thread, purple wool, red material, and quality linen wey them twist. 9 When them fold-am into two, na square shape e be. Them make the breastpiece wey long and wide reach one span of hand* when them fold-am. 10 Them put four rows of stones ontop-am. The first row get ruby stone, topaz stone, and emerald stone. 11 The second row get turquoise stone, sapphire stone, and jasper stone. 12 The third row get lesh′em stone,* agate stone, and amethyst stone. 13 The fourth row get chrys′o·lite stone, onyx stone, and jade stone. Them put all of them ontop gold to hold them. 14 The stones match the names of the 12 sons of Israel, them carve each name inside the stone like stamp, and each name stand for one of the 12 tribes.

15 Then them make chains wey them twist together, like ropes wey them make with pure gold, and put-am ontop the breastpiece. 16 Them use gold make two things wey fit hold something and two rings of gold and join the two rings to the two corners wey dey the up part of the breastpiece. 17 After that one, them put the two gold ropes inside the two rings wey dey the corners of the breastpiece. 18 Then them put the ends of the two ropes and make-am pass through the two things wey fit hold something, and join them to the pieces for the shoulders for front of the eph′od. 19 The next thing wey them do na say, them use gold make two rings and put them for the two corners wey dey the down part of the breastpiece. This part na the part wey dey inside, wey de face the eph′od. 20 Then them make another two rings with gold and put-am for front of the eph′od, under the two pieces for the shoulders and ontop the place where the belt* wey them weave join with the eph′od. 21 At last, them use blue rope tie the rings of the breastpiece to the rings of the eph′od to make the breastpiece dey for im position ontop the eph′od, ontop the belt* wey them weave, just the way Jehovah don command Moses.

22 Then e use only blue thread make coat wey no get hand for the eph′od, and na person wey de use wood weave things weave-am. 23 The coat wey no get hand get part wey open for middle, like the neck of coat wey them de wear to protect chest. Them weave design round the part wey dey open, so that e no go tear. 24 The next thing wey them do be say, them make pomegranate fruits with blue thread, purple wool, and red material wey them weave together, and put-am for the edge of the cloth for down. 25 And them use pure gold make bells and put the bells between the pomegranates.* Them put-am round the edge of the down part of the coat wey no get hand, between the pomegranates. 26 Them put one bell and one pomegranate follow each other one after the other, one bell and one pomegranate round the edge of the down part of the coat wey no get hand wey priest de wear to do im work, just the way Jehovah don command Moses.

27 And them make long cloths for Aaron and im sons with quality linen, and na person wey de use wood weave cloths weave-am. 28 Them still make the special headtie with quality linen, the headtie wey get design with quality linen, the linen knickers* with quality linen wey them twist, 29 and the cloth wey them de tie like belt with quality linen wey them twist, blue thread, purple wool, and red material wey them weave together, just the way Jehovah don command Moses.

30 At last, them make flat pure gold wey de shine, the holy sign of dedication,* and them carve this word ontop-am the way them de carve something inside stamp: “Na Jehovah dey holy.” 31 Them join-am to one rope wey them make with blue thread, so that them go fit put-am ontop the special headtie, just the way Jehovah don command Moses.

32 So them finish all the work for the tabernacle, the tent of meeting, and Israel people do everything wey Jehovah don command Moses. Na so them just do.

33 Then them bring the tabernacle to Moses, the tent and all the things wey them de use for the tents: im hooks, im frames, im long sticks, im pillars, and im base them; 34 im cover wey them make with ram skins wey them dye with red color, im cover wey them make with sealskins, the curtain for the screen; 35 the ark of the Testimony and im poles and the cover; 36 the table, all the things wey them de use for the table, and the showbread; 37 the lampstand wey them do with pure gold, im lamps, the lamps wey them arrange for line, and all the things wey them de use for the lampstand, and the oil for the light; 38 the altar wey them use gold make, the anointing oil, the perfume incense, the screen* for the domot of the tent; 39 the copper altar and im copper net wey them weave round, im poles, and all the things wey them de use for the altar, the basin and the basin stand; 40 the curtains wey de hang for the compound, im pillars and im base them, the screen* for the domot of the compound, im tent ropes and im tent pins and all the things wey them de use do work for the tabernacle, for the tent of meeting; 41 the cloth wey them really weave well wey them de use do work for holy place, the holy cloths for Aaron the priest, and the cloths for im sons wey de serve as priests.

42 Just as Jehovah don command Moses, na so Israel people do all the work. 43 When Moses check all their work, e see say them do-am just the way Jehovah don command; and Moses bless them.