Numbers
12 Now Mir′i·am and Aaron start to talk against Moses because of the Cush woman wey e marry, because e don marry wife from Cush. 2 Them de talk say: “Na only through Moses Jehovah don talk? E never talk through us too?” And Jehovah de listen. 3 Now na Moses be the man wey dey humble pass among all the men* for the whole earth.
4 At once, Jehovah talk to Moses and Aaron and Mir′i·am say: “Make the three of una comot go the tent of meeting.” So the three of them comot go. 5 And Jehovah come down inside the pillar of cloud and stand for the domot of the tent and call Aaron and Mir′i·am. The two of them move go front. 6 Then e talk say: “Abeg, make una hear wetin I want talk. If any prophet of Jehovah dey among una, I go make-am know who I be for vision, and I go talk to-am for dream. 7 But no be so e be with my servant Moses! I don put all my house for im hand.* 8 I de talk to-am face-to-face* for open place, no be with proverbs; and e de see as Jehovah de appear to-am. So, why una no fear to talk against my servant, against Moses?”
9 So Jehovah vex for them no be small and e leave them comot. 10 The cloud move comot from ontop the tent and see! leprosy catch Mir′i·am and e white like snow. Then Aaron turn look Mir′i·am and e see say leprosy don catch Mir′i·am. 11 Quick-quick, Aaron tell Moses say: “I de beg you my lord! Abeg, no hold us for this sin! We don behave like foolish people for the thing wey we don do. 12 Abeg, no let-am continue to live like person wey don die, person wey half of im flesh don rotten from when them born-am!” 13 And Moses start to cry to Jehovah de talk say: “O God, abeg, heal-am! Abeg!”
14 Jehovah answer Moses say: “If Mir′i·am papa spit direct for im face, e no go shame for seven days? Make them separate-am from other people for seven days for outside the camp, and after, them fit bring-am come back to the camp.” 15 So them separate Mir′i·am from other people and keep-am outside the camp for seven days, and the people no move go another place until Mir′i·am come back to the camp. 16 Then the people comot from Ha·ze′roth and start to stay* for the wilderness of Pa′ran.