Leviticus

23 Jehovah continue to talk to Moses say: 2 “Talk to Israel people and tell them say, ‘The festivals of Jehovah wey them de do for different-different season wey una go announce, na holy conventions. Na this ones be my festivals wey them de do for different-different season:

3 “‘Una fit work for six days, but the seventh day na sabbath of complete rest, na holy convention. Make una no do any kind of work. E go be sabbath to Jehovah for anywhere wey una de live.

4 “‘This ones na the festivals of Jehovah wey them de do for different-different season, the holy conventions wey una go announce for the different-different times wey them don fix for them: 5 For the first month, for the 14th day of the month, for evening,* na the Passover to Jehovah.

6 “‘The 15th day of this month na the Festival of Bread Wey No Get Yeast to Jehovah. Make una chop bread wey no get yeast for seven days. 7 For the first day, una go do holy convention. Make una no do any serious work. 8 But una go give offering wey them make with fire to Jehovah for seven days. Holy convention go dey for the seventh day. Make una no do any serious work.’”

9 Jehovah continue to talk to Moses say: 10 “Talk to Israel people and tell them say, ‘At last, when una come inside the land wey I de give una, and una don harvest things for there, una must bring one bundle of the firstfruits to the priest from wetin una harvest. 11 And e go wave the bundle go back and front for front of Jehovah to make God accept una. The priest go wave-am for the day after the Sabbath. 12 For the day wey una go wave the bundle, una must bring as offering one young ram wey well for body wey dey im first year, as offering wey them de burn to Jehovah. 13 Im grain offering go be two tenth of one e′phah* of better flour* wey them mix with oil, as offering wey them make with fire to Jehovah, wey get better smell.* Im drink offering go be one fourth of one hin* of wine. 14 Make una no ever chop new grain, grain wey them roast, or any bread wey them make from new grain until this day, until una bring the offering of una God. This one na law wey go last for long time for all una generation for anywhere wey una de live.

15 “‘Make una count seven sabbaths from the day after the Sabbath, from the day wey una bring the bundle of the offering wey them de wave. Make them be complete weeks. 16 Una go count 50 days until the day after the seventh Sabbath, and then make una bring new grain offering to Jehovah. 17 From where una de stay, make una bring two bread as offering wey them de wave. Una go make the bread with two tenth of one e′phah* of better flour.* Make una bake-am with yeast as first ripe fruits to Jehovah. 18 And make una bring the loaves together with seven small-small male sheep wey well for body, each of them go dey one year old, and one young bull and two rams. Them go be as offering wey them de burn to Jehovah together with the grain offering and drink offerings, as offering wey them make with fire, wey get better smell* to Jehovah. 19 And una must bring one young goat as sin offering and two small-small male sheep, each of them go dey one year, as peace sacrifice. 20 The priest go wave them go back and front, together with the bread of the first ripe fruits, as offering wey them de wave for front of Jehovah, together with the two small-small male sheep. Them go be something wey dey holy to Jehovah for the priest. 21 For this day, una go announce say holy convention dey for una. Una no go do any serious work. This one na law wey go last for long time for all the place them wey una go stay for all una generations.

22 “‘When una de harvest things for una land, make una no ever harvest the things for the edge of una farm finish, and make una no pick wetin remain from wetin una harvest. Make una leave-am for person wey dey poor* and for stranger wey de live for una land. I be Jehovah.’”

23 Jehovah continue to talk to Moses say: 24 “Tell Israel people say, ‘For the seventh month, for the first day of the month, make una get complete rest, and make una blow trumpet to remember-am, na holy convention. 25 Make una no do any serious work, and make una bring offering wey them make with fire to Jehovah.’”

26 Jehovah still talk to Moses say: 27 “But, the tenth day of this seventh month na the Day of Atonement. Make una do holy convention, and una must show una pain* and give offering wey them make with fire to Jehovah. 28 Make una no do any kind of work for this particular day because na day to get forgiveness of sins for una, for front of Jehovah una God. 29 Anybody* wey no show im pain* for this day, them go kill* the person comot from im people. 30 And I go destroy everybody* from among im people wey do any kind of work for this day. 31 Make una no ever do any kind of work. This one na law wey go last for long time for all una generation for anywhere wey una de live. 32 This one na sabbath of complete rest for una, and una go show una pain* for the ninth day of the month for evening. Una go do una sabbath from evening go reach evening.”

33 Jehovah continue to tell Moses say: 34 “Tell Israel people say, ‘The 15th day of this seventh month na the Festival of Booths* to honor Jehovah for seven days. 35 Holy convention go dey for the first day, and make una no do any serious work. 36 For seven days, una must give offering wey them make with fire to Jehovah. For the eighth day, make una do holy convention, and make una give offering wey them make with fire to Jehovah. This one na holy occasion. Make una no do any serious work.

37 “‘This ones na the festivals of Jehovah wey them de do for different-different season, wey una go announce as holy conventions, to give offering wey them make with fire to Jehovah: the offering wey them de burn and the grain offering of the sacrifice, and the drink offerings, according to the way e suppose be each day. 38 This ones go add join wetin them give as offering for Jehovah sabbaths, and join una gifts, una vow offerings,* and una offerings wey una heart move una to give, wey una suppose give Jehovah. 39 But, for the 15th day of the seventh month, when una don gather the things wey the land produce, make una celebrate the festival of Jehovah for seven days. The first day na day of complete rest, and the eighth day na day of complete rest. 40 For the first day, una go take the fruit of fine-fine trees, branches of palm trees, the branches of trees wey get plenty leaves, and branches of poplar trees wey de grow for lowland,* and una go really happy for front of Jehovah una God for seven days. 41 Una go celebrate-am as festival to Jehovah for seven days for the year. Make una celebrate-am for the seventh month as law wey go last for long time for all una generation. 42 Make una stay for tents wey them make with leaves for seven days. Make all the people wey come from Israel stay for inside the tents wey them make with leaves, 43 so that una generation wey de come for front fit know say I make Israel people live for inside tents wey them make with leaves, the time wey I de bring them come out from the land of Egypt. I be Jehovah una God.’”

44 So Moses tell Israel people about the festivals of Jehovah wey them de do for different-different season.