Leviticus

26 “‘Make una no ever make useless gods for unaself, and make una no ever arrange image wey them carve or idol pillar for unaself, and make una no ever put stone image for una land to bow down for im front; because I be Jehovah una God. 2 Make una obey my sabbath and show say una respect* my holy place. I be Jehovah.

3 “‘If una continue to follow my laws and continue to obey my commandments and una de do this things wey I talk, 4 I go give una rain for the correct time wey e suppose fall, and the land go produce and the trees for the land go produce their fruit. 5 The season when una de separate grain from plant go stretch reach the time wey una de harvest grape, and the time wey una de harvest grape go stretch reach the time wey una de plant; and una go chop una bread belleful and dey safe as una de live for una land. 6 I go bring peace for the land, and nobody go make una fear when una de lie down; and I go comot wicked bush animals from the land, and no sword go dey against una for una land. 7 Una go surely pursue una enemies and una go use sword win them. 8 Five of una go pursue 100 people, and 100 of una go pursue 10,000 people, and una go use sword win una enemies.

9 “‘I go favor* una and go make una plenty and spread, and I go keep the agreement wey I get with una. 10 As una still de chop the old things wey una farm produce from last year, una go need to clear the old things comot to make space for the new things. 11 And I go put my tabernacle among una and I* no go reject una. 12 I go dey with una* and be una God, and for una, una go be my people. 13 I be Jehovah una God wey bring una come out from the land of Egypt so that una no go be their slaves again. I free una from suffer* and I make una waka as free people.*

14 “‘But if una no go listen to me or continue to obey all this commandment, 15 and if una reject my laws, and if una* no gree do the things wey I don decide, and una no continue to obey all my commandments and una break my agreements, 16 for me, I go do this things to una: I go punish una with problem, with tuberculosis and serious fever, wey go make una eyes no de see well and de make una life* de go small-small. Una go plant una seed for nothing, because una enemies go chop-am. 17 I go dey against una,* and una enemies go win una; and people wey hate una go suffer* una, and una go run when nobody de pursue una.

18 “‘Even if this one no make una listen to me, I go punish una seven times more for una sins. 19 I go make una stop to dey stubborn and stop to carry shoulder up,* and I go make una heavens be like iron* and una earth like copper.* 20 Una go finish una power for nothing, as una land no go produce things, and the trees of the land no go produce fruit.

21 “‘But if una always de do wetin dey against me and una no gree listen to me, then I go punish una seven times more, according to una sins. 22 I go send bush animals wey dey the open land come meet una, and them go kill una children and kill una animals wey fit live with people and reduce the number of una people, and una roads go be place wey them abandon.

23 “‘If with this things, una still no accept my correction and una still want de do things wey dey against me, 24 then I go still do wetin dey against una and I go punish una seven times for una sins. 25 I go bring sword to punish una, because una break the agreement. If una gather unaself inside una cities, I go send disease come meet una and una enemy go win una. 26 When I destroy where una de get bread* from,* ten women go fit use only one oven to bake una bread, and then them go measure small amount of bread for una; and una go chop but una no go belleful.

27 “‘If with this thing, una still no want listen to me and una still want de do things wey dey against me, 28 I go dey against una more-more, and I go need to punish una seven times for una sins. 29 So una go chop the flesh of una sons and una go chop the flesh of una daughters. 30 I go destroy una idol high place them finish, and cut una stands wey una de put incense ontop reach ground, and heap una dead body ontop una rubbish idols* wey no get life, and I* go turn face comot from una, because una de smell. 31 I go allow them destroy una cities* and go make una holy place them empty, and I no go smell the better smell* of una sacrifice them. 32 I go make the land empty, and una enemies wey de live for there go de look the place with surprise. 33 And I go scatter una for the nations, and I go make una enemies attack una with sword;* and una land go empty, and them go destroy una cities.

34 “‘That time, the land go pay im sabbath finish for all the days wey e dey empty, when una dey for the land of una enemies. That time, the land go rest,* because e must pay im sabbaths. 35 For all the days wey e dey empty, e go rest because e no rest for una own sabbaths when una be de live inside.

36 “‘As for the people wey survive, I go full their heart with serious fear for the lands of their enemies; and the sound of leaf wey breeze de blow go make them run, and them go run like person wey them de use sword pursue and them go fall when nobody de pursue them. 37 Them go fall ontop each other like people wey them de use sword pursue, even though say nobody de pursue them. Una no go fit fight back una enemies. 38 Una go die among the nations, and the land of una enemies go chop una. 39 Una wey remain go dey there till una rotten for the lands of una enemies because of una sin. True-true, them go rotten finish because of the sins of their papa them. 40 Then them go confess their own sin and confess say their papa them don sin and them no dey faithful and them go gree say them no behave well* as them de do things wey dey against me. 41 Then I still do things wey dey against them as I bring them come inside the land of their enemies.

“‘Maybe this one go make their hearts wey no de feel anything* to dey humble, and then them go pay for their sin finish. 42 And I go remember my agreement with Jacob, and my agreement with Isaac, and I go remember my agreement with Abraham, and I go remember the land. 43 When them abandon the land, e de pay for im sabbaths and them no dey there when the land empty. Them de pay for their sin because them reject the things wey I don decide and them* no gree follow my laws. 44 But even with all this ones, when them dey the land of their enemies, I no go ever reject them finish or drive them comot sotey I destroy them finish, wey go break my agreement with them, because I be Jehovah their God. 45 Because of them, I go remember the agreement with their papa-papa them wey I bring come out from Egypt wey the nations see with their eyes, so that I go show say I be their God. I be Jehovah.’”

46 This na the directions, the decisions, and the laws wey Jehovah don make between imself and Israel people for Mount Si′nai through Moses.