Joshua

6 Now them lock everywhere for Jerʹi·cho well because of Israel people; nobody de comot and nobody de enter.

2 Then Jehovah tell Joshua say: “See, I don put Jerʹi·cho and im king and im strong soldiers for your hand. 3 Make all of una wey be soldiers march round the city. Make una go round the city once. That one na wetin you go do for six days. 4 Tell seven priests make them carry seven ram horns and dey front of the Ark. But for the seventh day, make una march round the city seven times and the priests go blow the horns. 5 When them don blow the ram horn, as una just hear the sound* of the horn, make all the people shout loud war shout. Then the wall of the city go fall flat for ground, and the people must enter,* each person go enter straight de go.”

6 So Joshua the son of Nun call the priests together and tell them say: “Make una carry the ark of the agreement, and make seven priests carry seven ram horns and dey front of the Ark of Jehovah.” 7 Then e tell the people say: “Make una de go and march round the city, and make the soldiers wey carry weapons de waka for front of the Ark of Jehovah.” 8 And as Joshua don tell the people, the seven priests wey carry the seven ram horns for front of Jehovah go front and blow the horns, and the ark of the agreement of Jehovah de follow them. 9 And the soldiers wey carry weapons go front of the priests wey de blow the horns, and the other soldiers de follow the Ark for back as the priests continue to blow the horns.

10 Now Joshua command the people say: “Make una no shout and make people no hear una voice. Make no word come out from una mouth until the day wey I go tell una say, ‘Shout!’ Then una go shout.” 11 Joshua make the Ark of Jehovah go round the city. E make-am go round the city once, and after that one, them go back to the camp and sleep for there for night.

12 Joshua get up early morning the next day, and the priests carry the Ark of Jehovah, 13 and seven priests wey carry seven ram horns de waka for front of the Ark of Jehovah and them continue to blow the horns. The soldiers wey carry weapons de waka for their front and the other soldiers de follow the Ark of Jehovah for back as them continue to blow the horns. 14 Them march round the city for the second day once, and after, them go back to the camp. Them do like that for six days.

15 For the seventh day, them get up early as day just break, and them march round the city for the same way seven times. Na only that day them march round the city seven times. 16 And for the seventh time, the priests blow the horns and Joshua tell the people say: “Shout, because Jehovah don give una the city! 17 We must destroy the city and everything for inside; na Jehovah get all of them. Na only Raʹhab the prostitute we no go kill, im and all the people wey dey with-am for inside the house, because e hide the messengers wey we send. 18 But, make una no near wetin we must destroy, so that the thing wey we must destroy no go hungry una and una come collect-am, and this one go bring serious problem for the camp of Israel and make-am be something wey them must destroy.* 19 But all the silver and the gold and the things wey them make with copper and iron dey holy to Jehovah. Them go put-am for the place wey them de keep the better-better things wey be Jehovah own.”

20 When them blow the horns, the people shout. As the people hear the sound of the horn and shout loud war shout, the wall fall flat for ground. After that one, the people enter* inside the city, each person enter straight de go, and them take over the city. 21 Them use sword destroy everything wey dey inside the city, whether na man or woman, young or old person, bull, sheep, and donkey.

22 Joshua tell the two men wey be hide go check* the land say: “Make una go the house of the prostitute and bring the woman come out and all im people, just as una don swear to-am.” 23 So the young men wey go check the land go inside and bring Raʹhab come out together with im papa, im mama, im brothers, and all im people. Na so them bring im whole family come out, and them take them go place wey dey safe for outside the camp of Israel.

24 Then, them burn the city and everything wey dey inside with fire. But the silver, the gold, and the things wey them make with copper and iron, them put-am for the place wey them de keep better-better things for the house of Jehovah. 25 Na only Raʹhab the prostitute and im papa family and all im people na im Joshua leave. And Raʹhab de live for Israel till today because e hide the messengers wey Joshua send to check Jerʹi·cho.

26 That time, Joshua swear* say: “Anybody wey decide to build this city of Jerʹi·cho again go be person wey them curse for front of Jehovah. For-am to put the foundation, im firstborn go die, and for-am to put the doors, im lastborn go die.”

27 So Jehovah dey with Joshua, and people come know-am well-well for the whole earth.