Joshua
7 But Israel people no follow wetin God talk for the matter wey concern wetin them must destroy, because A′chan wey be son of Car′mi, son of Zab′di, son of Ze′rah, from the tribe of Judah, take some of the things wey them suppose destroy. So Jehovah vex for Israel people no be small.
2 Then Joshua send men from Jer′i·cho go A′i, wey near Beth-a′ven and the east of Beth′el. E tell them say: “Make una go up go check* the land.” So the men go up go check A′i. 3 When them come back meet Joshua, them tell-am say: “No be all the people need to go up. Na only about two or three thousand men go reach to win A′i. No make all the people go so that them no go tire, because the people wey de live for there no plenty.”
4 So about 3,000 men go up, but them run from the men of A′i. 5 The men of A′i kill 36 men, and them pursue them from outside the city gate go reach Sheb′a·rim,* and them kill them as them de go down. So the strong heart* wey the people get melt and e comot like water wey de flow.
6 With this one, Joshua tear im cloth and bow with im face for ground for front of the Ark of Jehovah until evening reach, im and the elders for Israel, and them continue to pack sand* for their head. 7 Joshua talk say: “O Jehovah, the Lord Wey High Pass, why you bring us come far from the other side of River Jordan just to put us for the hand of Am′or·ite people to destroy us? E for better for us if to say we continue to stay for the other side* of River Jordan! 8 Abeg no vex for me, O Jehovah, wetin I fit talk now wey Israel don run from im enemies?* 9 When Ca′naan people and all the people wey de live for the land hear-am, them go surround us and wipe our name comot from the earth, and wetin you go do about your great name?”
10 Then Jehovah tell Joshua say: “Stand up! Why you lie down with your face for ground? 11 Israel don sin. Them don break my agreement wey I command them to follow. Them take some of the things wey them must destroy, them thief-am and hide put-am for inside their own property. 12 So, Israel people no go fit stand against their enemies. Them go turn and run from their enemies because them don be something wey them must destroy. I no go dey with una again unless una destroy wetin una suppose destroy from among una. 13 Get up and make the people holy! Tell them say, ‘Make una keep unaself holy for tomorrow, because this one na wetin Jehovah the God of Israel talk: “The thing wey them must destroy dey among una, O Israel. Una no go fit stand against una enemies until una comot the thing wey una must destroy from among una. 14 Make una gather unaself together for morning, tribe by tribe, and the tribe wey Jehovah select go come front, family by family, and the family wey Jehovah select go come front, house by house, and the people for the house wey Jehovah select go come front, man by man. 15 And the person wey them catch wey dey with the thing wey them must destroy, make una burn-am with fire, together with everything wey e get, because e don break the agreement of Jehovah and because e don do wetin bring disgrace come Israel.”’”
16 So Joshua get up early morning the next day and tell Israel people to come out, tribe by tribe, and them select the tribe of Judah. 17 E tell the families of Judah to come front and them select the family of Ze′rah, then e tell the family of Ze′rah to come front, man by man, and them select Zab′di. 18 At last, e tell people for the house of Zab′di to come front, man by man, and them select A′chan the son of Car′mi, son of Zab′di, son of Ze′rah, from the tribe of Judah. 19 Then Joshua tell A′chan say: “My son, abeg, make you honor Jehovah the God of Israel and confess to-am. Abeg, tell me wetin you do. No hide-am from me.”
20 A′chan answer Joshua say: “True-true, na me sin against Jehovah the God of Israel, and see wetin I do. 21 When I see one fine special cloth from Shi′nar and 200 shekels of silver and one gold bar wey the weight na 50 shekels* among the things for there, e hungry me to take them, so I take them. Now them dey inside ground for inside my tent where I hide them, with the money under-am.”
22 At once Joshua send messengers go, and them run go the tent. For there, them see the cloth wey e hide for inside the tent with the money under-am. 23 So them take the things from the tent and bring them come meet Joshua and all Israel people and them put them for front of Jehovah. 24 Then Joshua and all Israel people wey dey with-am carry A′chan the son of Ze′rah, the silver, the special cloth, and the bar of gold, together with im sons, im daughters, im bull, im donkey, the rest of im animals, im tent, and everything wey e get, and them carry them go up for the Lowland* of A′chor. 25 Then Joshua talk say: “Why you bring problem for us?* Jehovah go bring problem for you today.” Na so all Israel people stone-am, and after, them burn them with fire. So them stone all of them. 26 And them pack big heap of stones ontop-am wey still dey till today. This one make Jehovah vex cool down. That one na why the name of that place be Lowland* of A′chor* come reach today.