Joshua
1 After Moses the servant of Jehovah don die, Jehovah tell Joshua* the son of Nun, wey de help Moses say: 2 “Moses my servant don die. Now make you get up, cross River Jordan, you and all this people, and enter the land wey I de give them, wey I de give the people of Israel. 3 I go give una all the place wey una put una leg, just as I promise Moses. 4 Una land go start from the wilderness go up reach Lebʹa·non and go reach the great river, River Eu·phraʹtes—all the land of Hitʹtite people—and go reach the Great Sea* wey dey the west side.* 5 Nobody go fit stand against you all the days of your life. Just as I be dey with Moses, na so I go dey with you. I no go leave you or abandon you. 6 Make you get strong heart and dey strong, because na you be the person wey go make this people inherit the land wey I swear to their papa-papa them say I go give them.
7 “The only thing be say make you get strong heart and really dey strong, and sofri obey the whole Law wey Moses my servant don command you. Make you no turn comot from-am go the right side or the left side, so that you go fit de do things with sense anywhere wey you go. 8 Make this book of the Law no comot from your mouth, and you must sofri read-am* day and night, so that you go fit sofri do everything wey them write for inside; because na that time you go succeed for wetin you de do and then you go fit do things with sense. 9 No be me command you? Make you get strong heart and dey strong. No shake or fear, because Jehovah your God dey with you anywhere wey you go.”
10 Then Joshua command the officers of the people say: 11 “Waka go everywhere for the camp and command the people say, ‘Make una ready things wey una go need, because three days from now, una go cross River Jordan to enter and take the land wey Jehovah una God de give una to take as una own.’”
12 And Joshua tell the tribe of Reuʹben, the tribe of Gad, and the half tribe of Ma·nasʹseh say: 13 “Remember wetin Moses the servant of Jehovah command una say: ‘Jehovah una God de make una rest and e don give una this land. 14 Una wives, una children, and una animals go stay for the land wey Moses don give una for this side* of River Jordan, but all of una wey be strong soldiers go arrange unaself to fight and cross go the other side before una brothers. Una must help them 15 until Jehovah make una brothers rest just as e don make una rest, and them take the land too wey Jehovah una God de give them to take as their own. Then make una go back to the land wey them don give una to stay inside and take-am as una own, the land wey Moses the servant of Jehovah give una for the east side of River Jordan.’”
16 Them answer Joshua say: “We go do everything wey you don command us, and we go go anywhere wey you send us. 17 Just as we obey everything wey Moses talk, na so we go obey you. Only say make Jehovah your God dey with you just as e be dey with Moses. 18 Any man wey turn against wetin you talk and wey no obey everything wey you command-am, them go kill-am. The only thing be say make you get strong heart and dey strong.”