Deuteronomy
33 This one na the blessing wey Moses the man of the true God give Israel people before e die. 2 E talk say:
“Jehovah come from Si′nai,
And e shine ontop them from Se′ir.
E make im glory shine come out from the area wey mountains dey for Pa′ran,
And plenty-plenty holy angels* dey with-am,
Im soldiers dey for im right hand.
3 E love im people;
All their holy ones dey your hand.
Them sitdown near your leg;
Them start to listen to your words.
4 (Moses give us one command, one law,
As something wey the people* of Jacob go take as their own.)
5 And E come be king for Jesh′u·run,*
When the leaders of the people gather together,
Together with all the tribes for Israel.
6 Make Reu′ben dey alive and no die finish,
And make im men no reduce to small number.”
7 And e give Judah this blessing:
“O Jehovah, hear the voice of Judah,
And make you bring-am back to im people.
Im hands don defend* wetin be im own,
And make you help-am fight against im enemies.”
8 E talk about Le′vi say:
“Your* Thum′mim and your U′rim na for the man wey hold you tight,
Wey you test for Mas′sah.
You start to fight with-am near the water of Mer′i·bah,
9 The man wey talk about* im papa and im mama say, ‘I no see them as anything.’
E no even do like say e know im brothers,
And e no care about im own sons.
Because them continue to obey your word,
And them keep your agreement.
10 Make them tell Jacob about the things wey you don decide
And tell Israel about your Law.
Make them give incense as something wey get better smell to you*
And give complete offering ontop your altar.
11 Bless im power, O Jehovah,
And make you show say you like the things wey e de use im hands do.
Scatter the legs* of people wey stand up against-am,
So that people wey hate-am no go stand up again.”
12 E talk about Benjamin say:
“Make the person wey Jehovah love stay for place wey dey safe near-am;
As e give-am place wey go protect-am the whole day,
E go stay between im shoulders.”
13 E talk about Joseph say:
“Make Jehovah bless im land
With the better-better things from heaven,
With dew and water from the place wey water de come from, from under ground,
14 With the better-better things wey the sun de help produce
And the better things wey e de bring come out every month,
15 With the best things from the mountains wey don dey for long time*
And the better-better things from the hills wey don dey since,
16 With the better-better things of the earth, the things wey full inside,
And with the blessing of the Person wey de stay for the chuku-chuku tree.
Make them come ontop the head of Joseph,
For the top of the head of the person wey them choose from im brothers.
17 Im glory be like the one wey firstborn bull get,
And im horns na the horns of bush bull.
E go use them push* people
All of them together go reach the whole earth.
Na them be the ten-ten thousands from E′phra·im,
And na them be the thousands from Ma·nas′seh.”
18 E talk about Zeb′u·lun say:
“O Zeb′u·lun, make you de happy when you de go outside,
And you, Is′sa·char, make you de happy when you dey inside your tents.
19 Them go call people go the mountain.
And them go do the righteous sacrifice them for there.
Because them go chop from the plenty-plenty better things wey dey* the sea
And from the things wey get value wey hide for inside sand.”
20 E talk about Gad say:
“The person wey de make the boundaries of Gad dey wide go get blessing.
E lie down for there like lion,
Wey ready to tear the hand comot, yes, the top of the head.
21 E go select the first part for imself,
And na for there the person wey de give law keep im share.
The leaders of the people go gather together.
E go do the righteous things of Jehovah,
And the things wey God don decide with Israel.”
22 E talk about Dan say:
“Dan na lion pikin.
E go jump come out from Ba′shan.”
23 E talk about Naph′ta·li say:
“The favor wey Naph′ta·li get make-am belleful
And the blessing from Jehovah full im body.
Take the west side and south side as your own.”
24 E talk about Ash′er say:
“God don bless Ash′er with sons.
Make im brothers favor-am,
And make e put im leg inside* oil.
25 Na iron and copper them use make the things wey them de use lock your gate,
And you go dey safe all your life.*
26 Nobody be like the true God of Jesh′u·run,
Wey de ride pass inside heaven to help you
And wey de ride ontop the clouds for im glory.
27 God na place of protection from olden days,
Im hands wey dey forever dey under you.
And e go pursue the enemy comot from your front,
And e go talk say, ‘Destroy them finish!’
28 Israel go live for place wey dey safe,
And the well* of Jacob go dey where nothing go disturb-am
For land wey get grain and new wine,
Wey dew go de drop from im sky.
29 See as you de happy, O Israel!
Who be like you,
People wey Jehovah de save,
Your shield wey de protect you
And your great sword?
Your enemies go bow for your front because of fear
And you go march their backs.”*