The First Book of Samuel
3 That time, the boy Samuel de work for Jehovah, and E′li de direct-am. But e hard to get message from Jehovah that time; and them no de too see vision.
2 One day, E′li be lie down for where e de normally sleep. Im eyes don really bad, so e no de see well again. 3 For this time, them never off the lamp of God, and Samuel lie down for the temple* of Jehovah, where the Ark of God dey. 4 Then Jehovah call Samuel. E come answer say: “Na me be this.” 5 E run go meet E′li and talk say: “Na me be this, you be de call me.” But E′li talk say: “I no call you. Go back go lie down.” So e go back go lie down. 6 Then Jehovah call-am again: “Samuel!” So Samuel get up go meet E′li and talk say: “Na me be this, you be de call me.” But E′li talk say: “I no call you, my pikin. Go back go lie down.” 7 (That time, Samuel never know Jehovah well, and e never hear any message from Jehovah.) 8 Jehovah come call-am again for the third time, say: “Samuel!” So e get up go meet E′li and talk say: “Na me be this, you be de call me.”
Na that time E′li come know say na Jehovah de call the boy. 9 So E′li tell Samuel say: “Go lie down, and if e call you again, make you talk say, ‘Abeg, talk Jehovah, because your servant de listen.’” So Samuel go back go lie down for where e be de sleep.
10 Then Jehovah come stand there, and e call-am as e don de do before: “Samuel, Samuel!” So Samuel answer say: “Abeg, talk, because your servant de listen.” 11 Jehovah tell Samuel say: “See! I go do something for Israel wey go shock the two ears of anybody wey hear about-am. 12 That day, I go do everything wey I don talk about E′li and im family,* from beginning go reach the end. 13 You must tell-am say I go punish im family* forever, because im sons de curse God and e know about this sin, but e no stop them. 14 Na im make I don swear to the family* of E′li say no sacrifice or offering go fit ever cover for the sin of the family* of E′li.”
15 Samuel come lie down until morning reach; then e open the doors for Jehovah house. Samuel be de fear to tell E′li the vision. 16 But E′li call Samuel: “Samuel, my pikin!” Samuel come answer-am say: “Na me be this.” 17 E′li come ask-am say: “Wetin e tell you? Abeg, make you no hide-am from me. Make God punish you and add join-am if you hide any word from me out of all the things wey e tell you.” 18 So Samuel tell-am everything, e no hide anything from-am. E′li come talk say: “Na Jehovah. Make e do wetin good for im eye.”
19 Samuel continue to grow, and Jehovah imself dey with-am, and e make sure say e no get anything wey e talk wey no happen.* 20 All Israel people, from Dan go reach Be′er-she′ba, come know say Jehovah don choose Samuel as im prophet. 21 And Jehovah continue to appear for Shi′loh, because Jehovah show imself to Samuel for Shi′loh. Jehovah do this one with im word wey e de tell Samuel.