The Second Book of Chronicles
3 Then Sol′o·mon start to build the house of Jehovah for Jerusalem ontop Mount Mo·ri′ah, the place wey Jehovah be appear to im papa David, for the place wey David don arrange for where Or′nan wey be Je′bus person de separate grain from plant. 2 E start to build the house for the second day of the second month, for the fourth year wey e start to rule. 3 And the foundation wey Sol′o·mon dig to build the house of the true God long reach 60 cubits and e wide reach 20 cubits, according to the way them de measure cubits before.* 4 The veranda wey dey the front long reach 20 cubits, and na the same thing with the way the house wide reach, and e high reach 20 cubits;* and e cover the inside with pure gold. 5 E use juniper wood cover the big house, then e cover-am with better gold, and e carve image of palm trees and chains for the body to decorate-am. 6 Another thing be say, e use fine-fine special stones decorate the house, and the gold wey e use na gold wey come from Par·va′im. 7 E use gold cover the house, the woods wey them use for the roof, the domot, the walls, and the doors; and e carve image of cherubs for the body of the walls.
8 E come make the Most Holy Room;* e long reach 20 cubits, and na the same thing with the way the house wide reach, wey be, 20 cubits. And e cover-am with 600 talents* of better gold. 9 The gold wey them use make the nails heavy reach 50 shekels;* and e cover the room wey dey the roof with gold.
10 Then e make image of two cherubs and cover their body with gold and put them for the Most Holy Room.* 11 If them join the wings of the cherubs together, them long reach 20 cubits; one wing of the first cherub long reach five cubits and e de touch the wall of the house, and im other wing long reach five cubits and e de touch one of the wings of the other cherub. 12 And one wing of the other cherub long reach five cubits, and e de touch the wall for the other side of the house, and im other wing long reach five cubits, and e de touch one of the wings of the first cherub. 13 Them spread the wings of this cherubs and e wide reach 20 cubits, and the cherubs stand with their leg and them de face inside.*
14 E still use blue thread, purple wool, dark red thread, and better material make curtain, and e still design cherub put.
15 Then e make two pillars for front of the house, wey long reach 35 cubits, and the things wey them de call capital wey dey ontop of each pillar na five cubits. 16 And e make chains wey be like necklace, and e put them ontop of the pillars, and e make 100 pomegranates* and put them ontop the chains. 17 E put the pillars for front of the temple, e put one for right side* and put one for left side.* E name the one for the right side Ja′chin* and e name the one for the left side Bo′az.*