The Second of Kings
24 For the time of Je·hoi′a·kim, Neb·u·chad·nez′zar wey be king of Babylon come attack-am. Je·hoi′a·kim come be im servant for three years. But, e turn against the king of Babylon and e no gree obey-am again. 2 Then Jehovah start to send group of Chal·de′a people, Syria people, Mo′ab people, and Am′mon people wey de attack other people to come attack-am. E continue to send them to attack Judah so that them go destroy-am, just as Jehovah be don use im servants the prophets talk. 3 True-true, na Jehovah give the command say make this one happen to Judah, so that e go comot them from im front because of all the sins wey Ma·nas′seh don commit, 4 and because of the innocent people wey e kill, because e don full Jerusalem with the blood of innocent people, and Jehovah no want gree forgive Judah.
5 As for the other story about Je·hoi′a·kim, everything wey e do, them no write-am for the book wey talk about the things wey happen for the time of Judah kings? 6 Then Je·hoi′a·kim die like im papa-papa them, and im son Je·hoi′a·chin start to rule as king after-am.
7 The king of Egypt no ever come out of im land again, because the king of Babylon don collect everything wey the king of Egypt get, from the Lowland* of Egypt go reach River Eu·phra′tes.
8 Je·hoi′a·chin dey 18 years when e start to rule as king, and e rule for three months for Jerusalem. Im mama name na Ne·hush′ta the daughter of El·na′than wey come from Jerusalem. 9 E continue to do wetin bad for Jehovah eyes, like all the things wey im papa be don do. 10 That time, the servants of Neb·u·chad·nez′zar wey be king of Babylon come attack Jerusalem and them surround the city. 11 Neb·u·chad·nez′zar wey be king of Babylon come the city that time wey im servants surround-am.
12 Je·hoi′a·chin wey be king of Judah comot go meet the king of Babylon, e go with im mama, im servants, im leaders, and im servants wey get high position; and the king of Babylon carry-am go as slave for the eighth year wey the king of Babylon don de rule. 13 Then e carry all the better-better things wey dey the house of Jehovah and the better-better things wey dey the king house* comot. E pieces all the things wey them make with gold wey Sol′o·mon wey be king of Israel be make for Jehovah temple. This one happen just as Jehovah be don talk-am. 14 E carry all the people for Jerusalem go as slaves, plus all the prince them, all the strong soldiers, and everybody wey sabi use hand make things, and wey de use iron make things,* e carry 10,000 people go as slaves. E no leave anybody except the people wey poor pass for the land. 15 Na so e take carry Je·hoi′a·chin go Babylon as slave; e still carry the king mama, the king wives, im servants wey get high position, and the big-big men for the land, e carry them from Jerusalem go Babylon as slaves. 16 The king of Babylon still carry all the strong soldiers go Babylon as slaves. Them be 7,000, plus 1,000 people wey sabi use hand make things, and people wey de use iron make things,* all of them na strong men wey them don train to fight war. 17 The king of Babylon choose Mat·ta·ni′ah wey be Je·hoi′a·chin uncle, to rule as king after-am, and e change im name to Zed·e·ki′ah.
18 Zed·e·ki′ah dey 21 years when e start to rule as king, and e rule for 11 years for Jerusalem. Im mama name na Ha·mu′tal the daughter of Jeremiah wey come from Lib′nah. 19 E continue to do wetin bad for Jehovah eyes, like all the things wey Je·hoi′a·kim be don do. 20 Na because say Jehovah de vex na im make this things happen for Jerusalem and Judah, until e troway them from im front. And Zed·e·ki′ah turn against the king of Babylon.