The Second Book of Chronicles
10 Re·ho·bo′am go She′chem, because all Israel people don come She′chem to make-am king. 2 As Jer·o·bo′am wey be the son of Ne′bat just hear this one, (e be de live for Egypt and e still dey for there because e be run comot because of King Sol′o·mon), Jer·o·bo′am come back from Egypt. 3 Then them send some people make them go call-am come, and Jer·o·bo′am and all Israel people come meet Re·ho·bo′am and talk say: 4 “Your papa give us heavy load to carry,* but if you make the hard work wey your papa give us easy pass as e dey now and reduce the heavy load* wey e put for our head, we go serve you.”
5 So e tell them say: “Make una come back come meet me after three days.” So the people comot. 6 Then King Re·ho·bo′am talk with the old men* wey be don serve im papa Sol′o·mon when e dey alive and e ask them say: “Which advice una go fit give me wey I fit use answer this people?” 7 Them answer-am say: “If you treat this people well and make them happy and you answer them well, them go always be your servants.”
8 But, e no gree follow the advice wey the old men* don give-am. E come talk with the young men wey them grow up together and wey don be im servants now. 9 E ask them say: “Wetin una go advice make we answer this people wey de tell me say, ‘Reduce the heavy load wey your papa put for our neck?” 10 The young men wey grow up together with-am tell-am say: “This na wetin you go tell the people wey don tell you say, ‘Your papa give us heavy load to carry,* but make you reduce-am’; this na wetin you go tell them, ‘My small finger go big pass my papa hips. 11 My papa put heavy load ontop una, but I go add join una load.* My papa flog una with ordinary cane,* but I go flog una with cane* wey get chuku-chuku.’”
12 Jer·o·bo′am and all the people come meet Re·ho·bo′am for the third day, just as the king be tell them say: “Make una come back come meet me for the third day.” 13 But the king answer them with vex. Na so King Re·ho·bo′am no follow the advice wey the old men* don give-am. 14 E tell them wetin the young men don advice-am to talk say: “I go make una load heavy pass as e be now, and I go add join-am. My papa flog una with ordinary cane,* but I go flog una with cane* wey get chuku-chuku.” 15 So the king no listen to the people because na the true God make things change like this, so that wetin Jehovah don use A·hi′jah wey be Shi′loh person tell Jer·o·bo′am the son of Ne′bat go happen.
16 As for all Israel people, because say the king no gree listen to them, the people tell the king say: “Wetin we get to do with David? We no get anything wey we go gain from the son of Jes′se. Israel people, make everybody go meet im own gods! Now David, make you take care of your own family.”* Na so all Israel people take go their different-different house.*
17 But Re·ho·bo′am continue to rule Israel people wey de live for the cities wey dey Judah.
18 Then King Re·ho·bo′am send Ha·do′ram, wey de control the people wey the king don command to work for-am, but Israel people stone-am till e die. King Re·ho·bo′am just manage climb im chariot and e run go Jerusalem. 19 And Israel people don dey against the family* of David from that time till today.