The Second Book of Chronicles
15 Now the spirit of God come ontop Az·a·ri′ah the son of O′ded. 2 So e go meet A′sa and tell-am say: “O A′sa and all Judah and Benjamin, make una hear wetin I want talk! Jehovah dey with una as long as una continue to dey with-am; and if una find-am, e go let una see-am, but if una leave-am, e go leave una. 3 For long time,* Israel people no serve the true God, the priest no teach them and them no follow law. 4 But when them dey for problem, them come back to Jehovah the God of Israel and find-am, and God allow them see-am. 5 That time, nobody fit travel and dey safe,* because all the people wey de live for the lands just de fight-fight. 6 Nation de destroy another nation and one city de destroy another city, because God use different-different kind of problems confuse them. 7 But as for una, make una dey strong, and make una no tire,* because God go bless una work.”
8 As A′sa just hear this things and wetin prophet O′ded talk, im heart strong and e comot the rubbish idols from all the land of Judah and Benjamin and from the cities wey e collect from the areas wey mountains dey for E′phra·im, and e bring back the altar of Jehovah wey be dey the veranda of Jehovah house. 9 And e gather all the people from Judah and Benjamin together and strangers wey don join them from E′phra·im, Ma·nas′seh and Sim′e·on, because plenty of them run from Israel go meet-am when them see say Jehovah im God dey with-am. 10 So them gather together for Jerusalem for the third month of the 15th year wey A′sa de rule. 11 For that day, them do sacrifice to Jehovah from the things wey them collect from their enemies, 700 cows and 7,000 sheep. 12 Apart from that one, them make agreement to find Jehovah the God of their papa-papa them with all their heart and with all their soul.* 13 Anybody wey no find Jehovah the God of Israel, them go kill-am, whether na small person or big person, whether na man or woman. 14 So them promise Jehovah, and them do this one with loud voice, and them de shout de happy, de blow trumpets and horns. 15 And all Judah people happy because of the promise wey them don make, because them use all their heart make the promise, and use all their heart find-am, and e allow them see-am, and Jehovah continue to give them peace* for everywhere.
16 A′sa the king even comot Ma′a·cah im grandmama from im position as mama wey be queen,* because Ma′a·cah make one rubbish idol wey them de use worship the idol pole.* A′sa scatter the rubbish idol to pieces and burn-am for the Lowland* of Kid′ron. 17 But the high place* them be still dey Israel. Even with that one, A′sa use im whole heart serve God all im life.* 18 And e bring the things wey im and im papa don make holy come inside the house of the true God. Wetin e bring na silver, gold, and different-different things. 19 War no dey until the 35th year wey A′sa de rule.