The First Book of Samuel
27 But David tell imself say: “One day, Saul go kill me. The best thing for me na to run go the land of Phi·lisʹti·a people. That one go make Saul stop to find me for all the land of Israel. Na so I go take escape from-am.” 2 So David and the 600 men wey dey with-am comot go meet the king of Gath wey im name na A′chish, wey be the son of Ma′och. 3 David and im men stay with A′chish for Gath, each man with im own family. The people wey dey with David na im two wives, A·hin′o·am wey come from Jez′re·el and Ab′i·gail wey come from Car′mel, the widow of Na′bal. 4 When them tell Saul say David don run go Gath, e stop to find-am.
5 Then David tell A′chish say: “If you like me, abeg, make them give me one place for one of the small cities so that I go stay there. Why your servant go de stay with you for the king city?” 6 So A′chish give-am Zik′lag that day. Na im make Zik′lag come be city of the kings of Judah till today.
7 The whole time* wey David stay for the land of Phi·lisʹti·a people na one year and four months. 8 That time, David and im men de comot go attack Gesh′ur people, Gir′zite people, and Am′a·lek people, because this people be de live for one area wey start from Te′lam go reach Shur and go reach the land of Egypt. 9 Anytime wey David go attack the area, e no de allow anybody survive, whether na man or woman, but e de carry cows, sheep, donkeys, camels, and clothes. After, e go go back go meet A′chish. 10 Then A′chish go ask-am say: “Which people you go attack today?” David go talk say: “I go attack the people for the south side* of Judah” or “The south side of Je·rahʹme·el people land” or “The south side of Ken′ite people land.” 11 David no let any man or woman dey alive wey e go carry come Gath. E talk say: “So that them no go tell them about us say, ‘Na wetin David do be this.’” (Na like this e do for the whole time wey e stay for the land of Phi·lisʹti·a people.) 12 So A′chish believe David, and e tell imself say: ‘Im people for Israel go don really hate-am, so e go always be my servant.’