The Second Book of Chronicles
17 And Je·hosh′a·phat im son start to rule as king after-am and e make im position as king for Israel strong. 2 E put soldiers for all the cities for Judah wey get strong protection and e still put group of soldiers to watch the land of Judah and the cities of E′phra·im wey A′sa im papa don collect for war. 3 Jehovah continue to dey with Je·hosh′a·phat because e do things the way David im papa-papa be do for im own time and e no follow the idols of Ba′al. 4 Instead, e find the God of im papa and follow* im commandment and e no do things like Israel people. 5 Jehovah continue to make the kingdom strong well-well for im hand and all Judah people continue to give Je·hosh′a·phat gifts, e come get plenty money and property and them de respect-am no be small. 6 Im heart come strong to follow Jehovah ways, and e comot the high place* them and the idol poles* from Judah.
7 For the third year wey e de rule, e call the people wey e choose as leaders, wey be, Ben-ha′il, O·ba·di′ah, Zech·a·ri′ah, Ne·than′el, and Mi·cai′ah, make them teach the people for the cities of Judah. 8 The Levites wey dey with them na: She·mai′ah, Neth·a·ni′ah, Zeb·a·di′ah, As′a·hel, She·mir′a·moth, Je·hon′a·than, Ad·o·ni′jah, To·bi′jah, and Tob-ad·o·ni′jah, and the priests wey still follow them go na E·lish′a·ma and Je·ho′ram. 9 And them start to teach for Judah and them carry the book of Jehovah Law with them as them de go and them waka go everywhere for all the cities of Judah de teach the people.
10 And all the kingdoms of the lands wey surround Judah come de fear Jehovah, and them no fight Je·hosh′a·phat. 11 And Phi·lisʹti·a people bring gifts and money as tax come give Je·hosh′a·phat. Arab people still bring 7,700 rams and 7,700 male goats from their animals come give-am.
12 Je·hosh′a·phat continue to get power more-more and e continue to build place them wey get strong protection and cities wey them de keep things for Judah. 13 E do different-different kind of work for the cities of Judah, and for Jerusalem e get soldiers, wey be strong soldiers. 14 And e arrange them according to their family group for their papa side: for the tribe of Judah, for among the people wey de control one-one thousand soldiers, Ad′nah na the leader and na 300,000 strong soldiers dey with-am. 15 And Je·ho·ha′nan wey be leader dey under-am, and na 280,000 soldiers dey with-am. 16 Another person wey dey under-am na Am·a·si′ah wey be the son of Zich′ri, wey bring imself out to do Jehovah work, and na 200,000 strong soldiers dey with-am. 17 And from the tribe of Benjamin, e get one strong soldier wey im name na E·li′a·da, and na 200,000 men wey carry bow and shield dey with-am. 18 And Je·hoz′a·bad dey under-am, and na 180,000 soldiers wey ready for war dey with-am. 19 This na the people wey de work for the king apart from the other people wey the king put for the cities wey get strong protection for everywhere for Judah.