The Second Book of Samuel
8 After some time, David win Phi·lisʹti·a people, and start to control them. And David collect Meth′eg-am′mah from the hand of Phi·lisʹti·a people.
2 David still win Mo′ab people, and e make them lie down for ground, and use rope wey them take de measure something measure them. E measure two group wey go die, and one group wey go dey alive.* Mo′ab people come be servants to David, and de pay tax to-am.
3 David win Had·ad·e′zer wey be king of Zo′bah, wey be the son of Re′hob as Had·ad·e′zer dey road de go the area wey River Eu·phra′tes dey, so that e go start to control-am again. 4 David seize 1,700 soldiers wey de ride horse, and 20,000 soldiers wey de waka with leg, from-am. Then David cripple all the horse them wey de control chariot, but e leave only 100 horse them.
5 When Syria people wey dey for Damascus come help Had·ad·e′zer wey be king of Zo′bah, David kill 22,000 Syria people. 6 David come put groups of soldiers for Syria wey dey Damascus, and Syria people come be David servants and de pay tax. Jehovah make David win* for anywhere wey e go. 7 Apart from that one, the round shields wey them use gold make, David collect them from the servants of Had·ad·e′zer and bring them come Jerusalem. 8 King David still collect plenty-plenty copper from Be′tah and Be·ro′thai, wey be cities of Had·ad·e′zer.
9 That time, To′i wey be king of Ha′math come hear say David don win the whole army wey Had·ad·e′zer get. 10 So To′i send im son wey be Jo′ram go meet King David to ask-am how e dey and to greet-am well-well because e don fight and win Had·ad·e′zer (because Had·ad·e′zer be don go fight To′i many times), and e bring things wey them make with silver, gold, and copper. 11 King David make all this things holy to Jehovah, the way e don first make the silver and the gold wey e collect from all the nations wey e don win: 12 from Syria and Mo′ab, from Am′mon people, from Phi·lisʹti·a people, from Am′a·lek people, and from the things wey e collect from Had·ad·e′zer the king of Zo′bah wey be Re′hob pikin. 13 People come still know David well-well after e come back from where e go kill 18,000 E′dom people for the Lowland* of Salt. 14 E put groups of soldiers for E′dom. E put this groups of soldiers for everywhere for E′dom, and all E′dom people come be servants of David. Jehovah make David win* for anywhere wey e go.
15 David continue to rule all Israel people. David no de do partial when e de judge, and e de do wetin correct for all im people. 16 Na Jo′ab the son of Ze·ru′iah de control the army, Je·hosh′a·phat wey be the son of A·hi′lud de write the things wey happen. 17 Na Za′dok wey be the son of A·hi′tub and A·him′e·lech wey be the son of A·bi′a·thar be priests, and na Se·rai′ah be secretary. 18 Na Be·nai′ah wey be the son of Je·hoi′a·da de control Cher′e·thite people and Pel′e·thite people. And the sons of David come be leaders wey get high position.*