Leviticus

20 Jehovah continue to talk to Moses say: 2 “Make you tell Israel people say, ‘Any man from Israel and any stranger from another land wey de live for Israel wey give any of im pikin to Mo′lech, make una no fail to kill the person. Make the people of the land stone-am till e die. 3 I go dey against* that person and I go kill-am* comot from among im people, because e don give some of im children to Mo′lech and e don dirty my holy place and e don spoil my holy name. 4 If the people of the land do like say them no see wetin that person do when e give im pikin to Mo′lech and them no kill the person, 5 then me myself go surely dey against* that person and im family. I go kill* that person comot from im people, together with everybody wey join-am to worship* Mo′lech.

6 “‘As for the person* wey de follow people wey de talk with spirits and people wey de talk wetin go happen for future, wey go make-am no dey faithful to me,* I go surely dey against that person* and kill-am* comot from im people.

7 “‘Una must keep unaself separate* and become holy, because I be Jehovah una God. 8 And una must continue to obey my laws and do them. I be Jehovah, wey de make una holy.

9 “‘If anybody dey wey curse* im papa or im mama, make una no fail to kill the person. Since e curse im papa or im mama, im own blood dey im head.

10 “‘Now this one na about man wey sleep with another man wife: Make una no fail to kill the person wey sleep with another man wife, both the man and the woman.* 11 Man wey sleep with im papa wife don bring shame to im papa.* Make una no fail to kill the two of them. Their own blood dey their head. 12 If man sleep with im daughter-in-law, make una no fail to kill the two of them. Them don do wetin dey against wetin dey normal. Their own blood dey their head.

13 “‘If man sleep with man just as them de sleep with woman, the two of them don do serious bad thing. Make una no fail to kill them. Their own blood dey their head.

14 “‘If man marry woman and sleep with the mama of the woman,* this one na rotten thing.* Make una burn the man and the women with fire, so that this rotten character no go continue among una.

15 “‘If man sleep with animal, make una no fail to kill the man and make una kill the animal too. 16 If woman near any animal to sleep with-am, you must kill the woman and the animal. Make una no fail to kill the two of them. Their own blood dey their head.

17 “‘If man sleep with im sister, wey be the daughter of im papa or the daughter of im mama, and e see im sister nakedness and im sister see im nakedness too, this one na disgrace. Una must kill* them comot for front of their people. E don bring shame to im sister.* E go answer for im sin.

18 “‘If man lie down with woman wey de menstruate and do sex with the woman, both the man and the woman don show say them no respect the woman blood.* Make una kill* the two of them comot from among their people.

19 “‘Make you no ever sleep with your mama sister or your papa sister, because that one go bring shame to your close* family member. Them go answer for their sin. 20 Man wey sleep with im uncle wife don bring shame to im uncle.* Them go answer for their sin. Make them die with no pikin. 21 If man take im brother wife, this one na serious bad thing. E don bring shame to im brother.* Them no go get pikin.

22 “‘Una must obey all my laws and all the things wey I don decide and do them, so that the land wey I de carry una come to live inside no go vomit una come out. 23 Make una no ever follow the laws of the nations wey I de drive comot from una front, because them don do all this things and I really hate them. 24 Na because of this one I tell una say: “Una go take their land as una property and I go give-am to una as una property, land wey milk and honey de flow for inside. I be Jehovah una God wey don separate una from all the other people.” 25 Una must make difference dey between clean animal and the one wey no clean and between bird wey no clean and the one wey clean. Make una no ever dirty unaself* with animal or bird or anything wey de crawl for ground wey I separate for una to de see-am as something wey no clean. 26 Una must dey holy to me, because me, Jehovah, I dey holy, and I de keep una separate from all the other people so that una go be my own.

27 “‘Make una no fail to kill any man or woman wey de talk with spirit or wey de talk wetin go happen for future.* Make the people stone them till them die. Their own blood dey their head.’”