Exodus

31 Jehovah continue to talk to Moses say: 2 “See, I don choose* Bez′al·el the son of U′ri wey be the son of Hur wey come from the tribe of Judah. 3 I go make-am dey full with the spirit of God wey go give-am sense, make-am understand things, and make-am know all kind of handwork, 4 to make fine-fine designs, to work with gold, silver, and copper, 5 to de cut and de set stones, and to make all kind of things from wood. 6 Ontop that one, I don choose O·ho′li·ab the son of A·his′a·mach wey come from the tribe of Dan to help-am, and I de put sense inside the heart of everybody wey sabi handwork* so that them fit make everything wey I don command you: 7 the tent of meeting, the ark of the Testimony and the cover wey dey ontop-am, all the things wey una go use for the tent, 8 the table and the things wey them de use for the table, the lampstand wey them make with pure gold and all the things wey them de use for the lampstand, the altar of incense, 9 the altar of offering wey them de burn, and everything wey them de use for the altar, the basin and the basin stand, 10 cloths wey them really weave well, the holy cloths for Aaron the priest, the cloths for im sons wey go serve as priests, 11 the anointing oil, and the perfume incense for the holy place. Them go do everything wey I don command you.”

12 Jehovah still tell Moses say: 13 “Talk to Israel people and tell them say, ‘Make una make sure say una obey my sabbaths, because na sign between me and una for all una generation, so that una go fit know say me, Jehovah, I de make una dey holy. 14 Make una obey the Sabbath, because na something wey dey holy for una. Una must kill anybody wey do wetin go make-am no dey holy. If anybody do any work for the Sabbath day, then una must kill* the person* comot from im people. 15 Una fit work for six days, but the seventh day na sabbath of complete rest. Na something wey dey holy to Jehovah. Una must kill anybody wey de do work for the Sabbath day. 16 Israel people must obey the Sabbath; them must obey the Sabbath for all their generation. This one na agreement wey go last. 17 This one na sign wey go last between me and the people of Israel, because for six days Jehovah make the heavens and the earth, and for the seventh day e rest and e happy.’”

18 Now as God just talk with Moses finish ontop Mount Si′nai, e give Moses two slates of the Testimony, stone slates wey the finger of God write ontop.