Leviticus

18 Jehovah continue to talk to Moses, say: 2 “Talk to Israel people and tell them say, ‘I be Jehovah una God. 3 Make una no ever behave as them de behave for the land of Egypt where una be de stay, and make una no ever do wetin them de do for the land of Ca′naan, where I de carry una go. And make una no ever follow their laws. 4 Make una do the things wey I don decide, and make una continue to obey my laws and follow them. I be Jehovah una God. 5 Make una continue to do the things wey I don direct and the things wey I don decide; anybody wey de do this things go live because of them. I be Jehovah.

6 “‘Make nobody among una go meet any of im close family member to sleep with-am.* I be Jehovah. 7 Make you no ever sleep with your papa, and make you no ever sleep with your mama. Na your mama e be, and make you no ever sleep with-am.

8 “‘Make you no ever sleep with your papa wife. This one de bring shame to your papa.*

9 “‘Make you no ever sleep with your sister, whether na the daughter of your papa or the daughter of your mama, whether them born-am for the same house or them born-am for another house.

10 “‘Make you no ever sleep with the daughter of your son or the daughter of your daughter, because them be your own nakedness.

11 “‘Make you no ever sleep with the daughter of your papa wife, wey be the pikin of your papa, because na your sister e be.

12 “‘Make you no ever sleep with your papa sister. Na your papa close* family member.

13 “‘Make you no ever sleep with your mama sister, because na your mama close* family member.

14 “‘Make you no ever sleep with the wife of your papa brother, because that one go bring shame to your papa brother.* The woman na your aunty.

15 “‘Make you no ever sleep with your daughter-in-law. Na your son wife e be, make you no ever sleep with-am.

16 “‘Make you no ever sleep with your brother wife, because this one de bring shame to your brother.*

17 “‘Make you no ever sleep with woman and im daughter. Make you no ever take the daughter of im son and the daughter of im daughter to sleep with them. Them be im close family members; this one na rotten thing.*

18 “‘Make you no marry woman join im sister as second wife and sleep with-am when im sister still dey alive.

19 “‘Make you no ever near woman to sleep with-am when e no dey clean for the time of im menstruation.

20 “‘Make you no ever sleep with the wife of another man.* This one go make you no dey clean.

21 “‘Make you no ever sacrifice* any of your pikin to Mo′lech. Make you no ever spoil the name of your God for that way. I be Jehovah.

22 “‘Make you no ever sleep with man just as you de sleep with woman. This one na serious bad thing.

23 “‘Make man no ever sleep with animal, this one go make the man no dey clean; and make woman no give imself to animal to sleep with-am. This thing dey against wetin dey normal.

24 “‘Make una no use any of this things to make unaself no dey clean, because the nations wey I de drive comot from una front don make theirself no dey clean with all this things. 25 So, the land no dey clean, and I go punish the people wey de live for the land because of their sin, and the land go vomit them comot. 26 But una must continue to follow my laws and the things wey I don decide, and make una no ever do any of this serious bad things, whether na person wey come from una land or na stranger wey come from another land wey de stay among una. 27 Na all this serious bad things the people wey de live for the land before una be de do, and now the land no dey clean. 28 Then because una no dirty the land, e no go vomit una come out the same way wey e go vomit the nations come out wey be dey before una. 29 If anybody do any of this serious bad things, una must kill* all the people* wey de do this things comot from their people. 30 Una must continue to do everything wey I don talk and no follow any of the bad traditions wey people wey be de live for this place before una de do, so that una no go use this things to make unaself no dey clean. I be Jehovah una God.’”