Leviticus

19 Jehovah still talk to Moses say: 2 “Talk to all Israel people and tell them say, ‘Make una dey holy, because me, Jehovah una God, I dey holy.

3 “‘Make each of una respect* im mama and im papa, and make una obey my sabbaths. I be Jehovah una God. 4 Make una no follow useless gods or use metal wey them melt to make gods for unaself. I be Jehovah una God.

5 “‘Now if una de give peace sacrifice to Jehovah, make una sacrifice-am for way wey go make God accept una. 6 Make una chop-am for the day of una sacrifice and for the next day, but wetin remain till the third day, make una burn-am for fire. 7 But, if una chop any of-am for the third day, na something wey really bad wey God no go accept. 8 The person wey de chop-am go answer for im sin because e don make Jehovah holy thing no dey holy again, and una must kill* that person* comot from im people.

9 “‘When una de harvest things wey una plant for una land, make you no ever harvest the ones wey dey the edge of your farm finish, and make you no ever pick the ones wey remain from the things wey you harvest. 10 Another thing be say, make you no ever gather wetin remain from your vine farm or pick the grapes wey don scatter for your vine farm. Make you leave them for person wey dey poor* and stranger wey de live for the land. I be Jehovah una God.

11 “‘Make una no ever thief, make una no ever deceive person, and make una no ever cheat each other. 12 Make una no ever swear with my name for something wey be lie, and come spoil the name of your God. I be Jehovah. 13 Make you no ever use wayo collect another person thing, and make you no ever thief. The person wey you hire to work for you, make you no hold im salary for the whole night reach morning.

14 “‘Make you no ever curse* deaf person or put something for front of blind person to block road, and you must fear your God. I be Jehovah.

15 “‘Make una no ever do partial when una de judge matter. Make you no ever do partial for poor person or favor rich person. Make you judge another person for the correct way.

16 “‘Make you no ever de waka up and down de spread lie-lie among your people to spoil another person name. Make you no ever do anything wey go put the life of another person for danger.* I be Jehovah.

17 “‘Make you no ever hate your brother for your heart. Make you make sure say you correct the person so that you no go sin like-am.

18 “‘Make you no ever do your people* back for wetin them do you and no put wetin your people do you for mind. You must love another person as yourself. I be Jehovah.

19 “‘Make una obey my laws: Make you no ever bring two different kind of animals wey fit live with people to sleep with each other and born. Make you no ever plant two different kind of seeds for your farm, and make you no ever wear cloth wey them make with two different kind of thread wey them mix together.

20 “‘Now if man lie down with woman and do sex with the woman and the woman na servant wey them don plan to give another man as wife, but them never buy-am back or give-am im freedom, punishment must dey. But, make them no kill them because them never free the woman. 21 Make the man bring im offering for the bad thing wey e do come the domot of the tent of meeting to Jehovah, wey be, one ram, as offering for the bad thing wey person do. 22 The priest go use the ram of the offering for the bad thing wey person do as sacrifice for the man, for front of Jehovah for the sin wey e don do, and e go get forgiveness for the sin wey e do.

23 “‘When una come inside the land and una plant any tree to use as food, una must see wetin e produce as something wey no dey pure and wey una no go near.* For three years, una no go near-am.* Make una no ever chop-am. 24 But for the fourth year, all the fruit wey e produce go dey holy and go make una happy for front of Jehovah. 25 Then for the fifth year, una go chop the fruit wey e produce so that wetin e produce go add join wetin una harvest. I be Jehovah una God.

26 “‘Make una no ever chop anything wey blood dey inside.

“‘Make una no ever look for signs to know wetin go happen for future or de do magic.

27 “‘Make una no ever shave* the hair for the side of una face,* or spoil the edges of your beard-beard.

28 “‘Make una no ever cut una body because of person wey die,* and make una no ever draw tattoo marks for una body. I be Jehovah.

29 “‘No turn your daughter to prostitute, wey go make-am lose im honor, so that the land no go put hand for prostitute work and full the land with bad-bad character wey de bring shame.

30 “‘Una must obey my sabbaths, and una must show say una respect* my holy place. I be Jehovah.

31 “‘Make una no follow people wey de talk with spirit, and no go find out something from people wey de talk wetin go happen for future, so that them no go make una no dey clean. I be Jehovah una God.

32 “‘For front of person with white hair make you stand up, and you must show honor to old person,* and you must fear your God. I be Jehovah.

33 “‘If stranger from another land de live with you for una land, make una no ever treat-am anyhow. 34 Make una de see the stranger wey de live among una as person wey come from una land, and una must love-am as unaself, because before, una live as strangers for the land of Egypt. I be Jehovah una God.

35 “‘Make una no ever use measurement wey no correct to measure how something long reach, how e heavy reach, or how e plenty reach. 36 Make una use correct scales, correct weights, correct measurements for dry things,* and correct measurement for liquid.* I be Jehovah una God, wey bring una come out from the land of Egypt. 37 So una must obey all my laws and all the things wey I don decide, and una must follow them. I be Jehovah.’”