Joshua
5 As soon as all the kings of Amʹor·ite people wey dey the west side* of River Jordan and all the kings of Caʹnaan people wey dey near the sea, hear say Jehovah don dry the water for River Jordan for front of Israel people until them cross go the other side, them fear,* and them no get strong heart again* because of Israel people.
2 That time, Jehovah tell Joshua say: “Make you use sharp stone make knives for yourself and circumcise the men of Israel again, for the second time.” 3 So Joshua use sharp stone make knives and circumcise the men of Israel for Gibʹe·ath-ha·arʹa·loth.* 4 This na the reason wey make Joshua circumcise them: All the men among the people wey comot from Egypt, wey be all the men wey fit fight war,* don die for wilderness as them de travel after them comot from Egypt. 5 All the people wey comot from Egypt don circumcise, but all the people wey them born for the wilderness as them de travel after them comot from Egypt never circumcise. 6 Israel people don waka for 40 years for the wilderness until the whole nation die finish, wey be, the men wey fit fight war wey comot from Egypt wey no obey the voice of Jehovah. Jehovah swear to them say e no go ever allow them see the land wey Jehovah don swear about to their papa-papa them to give us, land wey milk and honey de flow for inside. 7 So e choose their sons instead of them. Na this ones Joshua circumcise; them never circumcise because them no circumcise them as them de travel.
8 When them circumcise the whole nation finish, them stay for where them dey for the camp until them well.
9 Then Jehovah tell Joshua say: “Today I don roll the shame from Egypt comot from una.” Na im make them de call that place Gilʹgal* till today.
10 Israel people continue to stay for their camp for Gilʹgal, and them do the Passover for the 14th day of the month, for evening, for the level lands wey dey the desert of Jerʹi·cho. 11 And the day after the Passover, them start to chop the things wey the land produce, bread wey no get yeast and grains wey them roast, for the same day. 12 And the manna stop the next day when them don chop some of the things wey the land produce. Manna no come dey for Israel people again, but them start to chop the things wey the land of Caʹnaan produce that year.
13 As Joshua look up when e near Jerʹi·cho, e see one man wey stand for im front with sword for im hand wey e don bring come out. Joshua waka go meet-am and ask-am say: “You dey our side or na our enemies side you dey?” 14 So e talk say: “No, but I don come as prince* of Jehovah army.” With that one, Joshua kneel down and bow face ground, and lie down. Then e ask-am say: “Wetin my lord want tell im servant?” 15 The prince of Jehovah army answer Joshua say: “Remove your sandals from your leg, because the place wey you stand dey holy.” At once, Joshua do like that.