Deuteronomy
18 “The Levites wey be priests, and infact the whole tribe of Le′vi, no go get share or property together with Israel. Them go chop from the offerings wey them make with fire to Jehovah, wey be im property. 2 So make them no get any property among their brothers. Na Jehovah be their property, just as e don tell them.
3 “Now, na this one be the part of the sacrifice wey the priests suppose get from the people: Anybody wey do sacrifice, whether na bull or sheep, make e give the priest the shoulder, the jaws, and the belle. 4 Make you give-am the firstfruits of your grain, your new wine, your oil, and the first wool wey you remove from your sheep. 5 Jehovah your God don choose-am with im sons from all your tribes to use the name of Jehovah do work everytime.
6 “But if Levite comot from one of your cities wey dey Israel where e be de stay and e* want go the place wey Jehovah choose,* 7 e fit work for there with the name of Jehovah im God like all im brothers wey be the Levites, wey de work for there for front of Jehovah. 8 E go get the same share of food with them, plus wetin e go get when e sell im family property.
9 “When you enter inside the land wey Jehovah your God de give you, make you no try to copy the things wey God really hate wey those nations de do. 10 Make anybody wey de burn im son or im daughter for fire as sacrifice* no dey among una, anybody wey de use demon power know wetin people no know, anybody wey de do magic, anybody wey de look for signs to know wetin go happen for future, person wey de use demon power to do other people bad, 11 anybody wey de use magic power curse other people, anybody wey de talk with spirit to find out something or person wey de talk wetin go happen for future, or anybody wey de find out things from people wey don die. 12 Jehovah really hate anybody wey de do this things, and because of this serious bad things, Jehovah your God de drive those nations comot from your front. 13 Make you show say them no fit talk bad about you for front of Jehovah your God.
14 “And this nations wey you de collect their land be de listen to this people wey de do magic and wey de use demon power to know wetin people no know, but Jehovah your God no allow you to do anything like this. 15 Jehovah your God go raise prophet like me for you from among your brothers. Una must listen to-am. 16 This one na the answer to wetin you ask Jehovah your God for Hor′eb for the day wey una gather,* when you talk say, ‘Make you no make me hear the voice of Jehovah my God or see this big fire again, so that I no go die.’ 17 Then Jehovah tell me say, ‘Wetin them don talk dey good.’ 18 I go bring prophet like you for them from among their brothers and I go tell-am wetin e go talk, and e go tell them everything wey I command-am. 19 True-true, I go hold the person wey no listen to my words wey e go use my name talk.
20 “‘If any prophet use my name talk wetin e no get right to talk wey I no command-am to talk, or e use the name of other gods talk, that prophet must die. 21 But, you fit talk for inside your heart say: “How we go know say Jehovah no talk this thing?” 22 When the prophet use the name of Jehovah talk and the thing wey e talk no work or happen as e talk-am, then Jehovah no talk that thing. The prophet talk wetin e no get right to talk. Make you no fear-am.’