Exodus

28 “From among Israel people you go call your brother Aaron together with im sons, so that e fit serve as priest for me, Aaron together with Na′dab and A·bi′hu, El·e·a′zar and Ith′a·mar, wey be Aaron sons. 2 You go make holy cloths for Aaron your brother, wey go give-am honor and make-am fine. 3 You go talk to all the people wey sabi handwork,* the people wey I don give spirit wey de give them sense, and them go make cloths for Aaron to make-am dey holy, so that e go fit serve as my priest.

4 “Na this kind cloths them go make: breastpiece,* eph′od,* coat wey no get hand, cloth wey get check design, special head-tie, and cloth wey them de tie like belt. Na this holy cloth them go make for your brother Aaron and im sons, so that e fit serve as my priest. 5 The people wey sabi handwork go use gold, blue thread, purple wool, red material, and quality linen.

6 “And them go make the eph′od with gold, blue thread, purple wool, red material, and quality linen wey them twist, and them go weave design ontop-am. 7 Make the eph′od get two pieces wey go join-am together ontop the shoulder for im two edge. 8 As for the belt wey them weave,* wey them de tie ontop the eph′od to make-am stay well for im position, make them use the same materials make-am: gold, blue thread, purple wool, red material, and quality linen wey them twist.

9 “Make you take two onyx stones and write the names of the sons of Israel ontop-am, 10 make you write six names for one stone and the six names wey remain for the other stone, according to how them born them. 11 Make person wey sabi write something inside stone, write the names of the sons of Israel ontop the two stones the same way them de write for inside stamp. Then make you put gold around the stones to hold them. 12 Make you put the two stones ontop the two pieces wey dey the shoulder of the eph′od as stones wey them go de use remember the sons of Israel, and Aaron must carry their names for front of Jehovah ontop im two shoulder to remember them. 13 You go use gold make something to hold the stones 14 and you go make two chains with pure gold, and twist-am like rope, and you go join the chains wey be like rope to the things wey hold the stones.

15 “Make you tell person wey sabi design things ontop cloth to make the breastpiece* of judgment. Make e make-am like the eph′od, with gold, blue thread, purple wool, red material, and quality linen wey them twist. 16 When you fold-am into two, make e be square shape, and make e long reach one span* and wide reach one span. 17 Make you put stones ontop-am, four rows of stones. The first row go get ruby stone, topaz stone, and emerald stone. 18 The second row go get turquoise stone, sapphire stone, and jasper stone. 19 The third row go get lesh′em stone,* agate stone, and amethyst stone. 20 The fourth row go get chrys′o·lite stone, onyx stone, and jade stone. Make you put all of them ontop gold to hold them. 21 The stones go match the names of the 12 sons of Israel. Them go carve each name inside the stone like stamp, and each name go stand for one of the 12 tribes.

22 “You go make chains wey them twist together ontop the breastpiece, like ropes wey them make with pure gold. 23 You go use gold make two rings for the breastpiece and you go join the two rings to the two corners wey dey the up part of the breastpiece. 24 You go put the two gold ropes inside the two rings wey dey the corners of the breastpiece. 25 You go take the two ends of the two ropes and make-am pass through the two things wey hold the stones, and you go join them to the pieces wey dey the shoulders of the eph′od for front. 26 You go use gold make two rings and put them for the two corners wey dey the down part of the breastpiece. This part na the part wey dey inside, wey de face the eph′od. 27 Make you still use gold make another two rings and put-am for front of the eph′od, under the two pieces wey dey the shoulders, near the place wey them join together. E go dey ontop the belt wey them weave,* wey dey for the eph′od. 28 You go use one blue rope tie the breastpiece make e dey for im position, you go tie the rings of the breastpiece to the rings of the eph′od. This one go make the breastpiece dey together with the eph′od, ontop the belt wey them weave.*

29 “When Aaron de enter inside the Holy Room, e must carry the names of the sons of Israel ontop the breastpiece of judgment for im chest,* so that Jehovah go always de remember them. 30 You go put the U′rim and the Thum′mim* inside the breastpiece of judgment, and Aaron go wear-am for im chest when e want come front of Jehovah, and Aaron must carry this things wey them de use judge matter for Israel people ontop im chest for front of Jehovah everytime.

31 “And na only blue thread you go use make the coat wey no get hand for the eph′od. 32 You go open the top part* of the coat for middle. Make person wey de use wood weave cloth weave round the area wey open. Make e be like the neck of coat wey them de wear to protect chest,* so that e no go tear. 33 You go make pomegranate fruits with blue thread, purple wool, and red material, and put-am round the edge of the cloth for down, and still use gold make bells, and put-am between the pomegranates. 34 You go put one gold bell and one pomegranate* de follow each other one after the other, one gold bell and one pomegranate, na so you go arrange-am round the edge of the down part of the coat wey no get hand. 35 Aaron must wear-am so that e fit do im work, and people must hear the sound from the cloth when e de go inside the holy place for front of Jehovah and when e de come outside, so that e no go die.

36 “You go use pure gold wey them make flat wey de shine, and you go carve this word ontop-am the way them de carve something inside stamp: ‘Na Jehovah dey holy.’ 37 You must use blue rope tie-am to the special headtie and e must always dey front of the special headtie. 38 E go dey for Aaron forehead, and when anybody no use the holy things well, the sin go dey for Aaron head. Israel people de make this things holy when them bring them as holy gifts for God. E go always dey for front of im head so that Jehovah fit accept the people.

39 “Make you weave the check cloth wey them make with quality linen. Use quality linen make headtie, and weave cloth wey them go tie like belt.

40 “You go still make long cloths, cloths wey them de tie like belt, and headtie for Aaron sons, to honor them and make them fine. 41 You go dress your brother Aaron and im sons wey dey with-am and you go anoint them and appoint them as priests* and make them holy, and them go serve as priests for me. 42 Make you still use linen make knickers* for them, to cover their nakedness. Make e long from the hip go reach the lap. 43 Aaron and im sons must wear this things when them de come inside the tent of meeting or when them de come near the altar to work for the holy place, so that them no go bring sin ontop their head and die. This one go be law wey go dey for long time for Aaron and im children* wey go come after-am.