The First of Kings

9 As Sol′o·mon just build the house of Jehovah finish, the house* of the king, and everything wey dey im mind to build, 2 Jehovah appear to Sol′o·mon the second time, the way e appear to-am for Gib′e·on. 3 Jehovah tell-am say: “I don hear your prayer and as you beg for pity when you dey my front. I don make this house wey you build holy as I don put my name for there forever, and my eyes and my heart go always dey there. 4 And you, if you serve me as your papa David serve me with complete heart, and you de do wetin correct for my eyes as you de do everything wey I command you, and you de obey my directions and follow my judgments, 5 then I go make the throne of your kingdom for Israel last forever, just as I promise David your papa say, ‘Man wey go sitdown for the throne of Israel go always dey for your family.’ 6 But if una and una sons stop to follow me, and una no obey my commandments and my laws wey I don give una, una come start to worship other gods and de bow down to them, 7 I go comot Israel people from the land wey I don give them, and this house wey I don make holy for my name, I go comot-am from my front, and Israel people go become people wey all other people go laugh* and them go use them do yeye. 8 And this house go scatter reach ground. Everybody wey de pass go look-am with surprise and hiss, and talk say, ‘Why Jehovah do this land and this house like that?’ 9 Then them go talk say, ‘Na because them leave Jehovah their God wey bring their papa-papa them from the land of Egypt, them come go meet* other gods, de bow down to them and de serve them. Na because of this one Jehovah make them get all this serious problem.’”

10 Na 20 years Sol′o·mon use build the two house, wey be, the house of Jehovah and the house* of the king. 11 Hi′ram the king of Tyre be don give Sol′o·mon cedar and juniper timbers, and e still give-am plenty gold as Sol′o·mon want. So King Sol′o·mon give Hi′ram 20 cities for the land of Gal′i·lee. 12 Then Hi′ram comot from Tyre go see the cities wey Sol′o·mon don give-am, but e no like them.* 13 E talk say: “My brother, which kind cities be this wey you give me so?” So them come de call the cities the Land of Ca′bul* reach today. 14 That time, Hi′ram send 120 talents* of gold go give the king.

15 This na the record of people wey King Sol′o·mon command say make them work for-am to build the house of Jehovah, im own house,* the Hill,* the wall of Jerusalem, Ha′zor, Me·gid′do, and Ge′zer. 16 (Phar′aoh wey be king of Egypt be don come seize Ge′zer and use fire burn-am, e be don still kill Ca′naan people wey de live for that city. So e give im daughter wey be the wife of Sol′o·mon this city as marriage gift.) 17 Sol′o·mon build Ge′zer again,* with Lower Beth-ho′ron, 18 Ba′al·ath, and Ta′mar for the wilderness, for inside the land, 19 plus all Sol′o·mon cities wey them de keep things, the chariot cities, the cities wey the people wey de ride horse de stay, and anything wey Sol′o·mon want build for Jerusalem, for Leb′a·non, and for all the land wey e de rule. 20 As for all the people wey remain, wey be, Am′or·ite people, Hitʹtite people, Per′iz·zite people, Hi′vite people, and Jeʹbus people, wey no be part of Israel people, 21 their children-children wey remain for the land, wey Israel people no fit destroy, Sol′o·mon command them to work for-am as slaves till today. 22 But Sol′o·mon no use any Israel person as slave because na them be im warriors, im servants, people wey get high position, im officers, and na them de control people wey de ride im chariots and people wey de ride im horse them. 23 E get 550 oga them wey de control the supervisors wey de do Sol′o·mon work, and na them de control the people wey de do the work.

24 But Phar′aoh daughter comot from the City of David come im own house wey Sol′o·mon build for-am, then Sol′o·mon build the Hill.*

25 Three times every year, Sol′o·mon de do sacrifice them wey them de burn and peace sacrifice them, ontop the altar wey e build for Jehovah and still make sacrifice smoke ontop the altar, wey be dey Jehovah front. Na so e take finish the house.

26 King Sol′o·mon still make plenty ship for E′zi·on-ge′ber, wey near E′loth, for the place wey near the Red Sea for the land of E′dom. 27 Hi′ram send im own servants to work with Sol′o·mon servants to control the ships. This Hi′ram servants na people wey sabi control ship well-well. 28 Them go O′phir and carry 420 talents of gold from there come give King Sol′o·mon.