The First Book of Samuel
22 So David comot from there, run go hide for the cave of A·dul′lam. When im brothers and everybody for im papa family* hear this one, them go there go meet-am. 2 And all the people wey get problem, wey de owe person and wey no happy about their life gather go meet-am, e come be their chief. Na about 400 men dey with-am.
3 After, David comot from there go Miz′peh for Mo′ab and e tell the king of Mo′ab say: “Abeg allow my papa and mama stay with you until I know wetin God go do for me.” 4 So e leave them with the king of Mo′ab, and them stay with the king for the whole time wey David dey for the safe place.
5 After some time, Gad the prophet tell David say: “Make you no stay for the safe place. Comot from there go the land of Judah.” So David comot and enter the forest of He′reth.
6 Saul come hear say them don see David and the men wey dey with-am. That time, Saul dey for Gib′e·ah, e sitdown under one tamarisk tree wey dey for the high place,* and im spear dey im hand, and all im servants stand around-am. 7 Then Saul ask im servants wey stand around-am say: “Abeg, make una listen, una wey come from the tribe of Benjamin. The son of Jes′se go give all of una lands and vine farms as I give una? E go choose all of una as people wey de control one-one thousand soldiers and people wey de control hundred-hundred soldiers? 8 All of una don plan against me. Nobody tell me say my own pikin make agreement with Jes′se pikin! Nobody among una pity me and tell me say my own pikin don put-am for the mind of my own servant say make e hide wait for me to attack me, as e be now.”
9 Then Do′eg wey be E′dom person and wey them put for there as leader of the servants of Saul, come answer-am say: “I see Jes′se pikin wey come meet A·him′e·lech the son of A·hi′tub for Nob. 10 And A·him′e·lech help-am ask for Jehovah direction, and give-am food. E even give-am the sword of Go·li′ath the Phi·lisʹti·a man.” 11 Quick-quick, the king talk say make them go call A·him′e·lech the priest wey be son of A·hi′tub and all the priests for im papa family* wey dey for Nob. So all of them come meet the king.
12 Saul come talk say: “Abeg, listen, you wey be the son of A·hi′tub!” A·him′e·lech come answer-am say: “I de listen my lord.” 13 Saul come ask-am say: “Why you and Jes′se pikin plan against me as you give-am bread and sword, and ask God for direction for-am? E dey against me and e hide de wait to attack me, as e be now.” 14 Then A·him′e·lech ask the king say: “E get anybody among your servants wey them fit trust reach David? Na king in-law e be, na person wey de control your bodyguard and them de respect-am for your house. 15 Na today be the first time wey I de ask of God direction for-am? I no fit even think-am say I want plan against you as you talk so! Make the king no think say im servant and im whole papa family* don do any bad thing, because me your servant no know anything about any of this things.”
16 But the king talk say: “A·him′e·lech, you and everybody for your papa family* must die.” 17 Then the king tell the guards* wey dey around-am say: “Make una turn and kill the priests of Jehovah, because them don join David, them know say David run from me, and them no tell me!” But the king servants no want use their hand kill the priests of Jehovah. 18 The king come tell Do′eg say: “Make you turn and kill the priests!” Quick-quick, Do′eg wey be E′dom person come go kill the priests by imself. That day, e kill 85 priests.* 19 E still use sword kill people for the city of Nob wey priests de stay, whether na man, woman, pikin, small baby, bull, donkey, and sheep. E use sword kill all of them.
20 But A·bi′a·thar wey be one of the sons of A·him′e·lech, wey be son of A·hi′tub, escape and run go follow David. 21 A·bi′a·thar tell David say: “Saul don kill the priests of Jehovah.” 22 So David tell A·bi′a·thar say: “As I see Do′eg wey be E′dom person for there that day, I know say e must tell Saul. Na because of me them kill everybody* for your papa family.* 23 Dey with me, make you no fear, because anybody wey want kill you,* na me* e want kill. I go protect you.”