The First of Kings
4 King Sol′o·mon rule everywhere for the land of Israel. 2 This na the people wey get high position for im kingdom: Az·a·ri′ah wey be the son of Za′dok na the priest; 3 na El·i·hor′eph and A·hi′jah wey be sons of Shi′sha be secretaries; na Je·hosh′a·phat wey be the son of A·hi′lud de write the things wey happen; 4 na Be·nai′ah wey be the son of Je·hoi′a·da de control the army; Za′dok and A·bi′a·thar na priests; 5 Az·a·ri′ah the son of Nathan na im de control the governors; Za′bud wey be the son of Nathan na priest and the king friend; 6 na A·hi′shar de control things for the palace; and na Ad·o·ni′ram the son of Ab′da de control the people wey the king don command to work for-am.
7 Sol′o·mon get 12 governors wey de control the whole land of Israel and wey de bring the food wey the king and im family de chop. Every year each of them get the work to de bring food for one full month. 8 Na this people be the governors: The son of Hur de control the area wey mountains dey for E′phra·im; 9 the son of De′ker de control Ma′kaz, Sha·al′bim, Beth-she′mesh, and E′lon-beth-ha′nan; 10 the son of He′sed de control A·rub′both (na im still de control So′coh and all the land for He′pher); 11 the son of A·bin′a·dab de control all the area wey dey the hills for Dor, (na im marry Sol′o·mon daughter wey im name na Ta′phath); 12 Ba′a·na the son of A·hi′lud de control Ta′a·nach, Me·gid′do, and everywhere for Beth-she′an, wey near Zar′e·than, and wey dey the down side of Jez′re·el. The area start from Beth-she′an go reach A′bel-me·ho′lah and from there go reach Jok′me·am area; 13 the son of Ge′ber de control Ra′moth-gil′e·ad (na im de control the small-small village them* wey Ja′ir the son of Ma·nas′seh get, wey dey for Gil′e·ad; and e still de control Ar′gob area wey dey for Ba′shan, na 60 big-big cities wey get walls and copper bars dey there); 14 A·hin′a·dab the son of Id′do de control Ma·ha·na′im; 15 A·him′a·az de control Naph′ta·li area (e marry Bas′e·math, wey still be one of Sol′o·mon daughters); 16 Ba′a·na the son of Hu′shai de control Ash′er area and Be·a′loth; 17 Je·hosh′a·phat the son of Pa·ru′ah de control Is′sa·char area; 18 Shim′e·i the son of E′la de control Benjamin area; 19 Ge′ber the son of U′ri de control the land of Gil′e·ad, wey be the land wey Si′hon the king of Am′or·ite people and Og king of Ba′shan de rule before. E still get one governor wey de control all this other governors for the land.
20 The people for Judah and Israel plenty like the sand wey dey the side of sea. Them de chop, de drink, and de happy.
21 Sol′o·mon rule all the kingdoms from the River* go reach the land of Phi·lisʹti·a people and even reach the boundary for Egypt. Them de pay tax to Sol′o·mon and them work for-am all im life.
22 The food wey Sol′o·mon de chop everyday na 30 cor measures* of better flour* and 60 cor measures of ordinary flour, 23 10 agric cows, 20 native cows, and 100 sheep, plus some other animals wey them de call stag, gazelle, roebuck, and fat birds wey them de call cuckoo. 24 Because na im de control everything wey dey for this side of the River,* from Tiph′sah go reach Gaz′a, na im still de control all the kings wey dey for this side of the River, and peace dey for the whole land and for all the area around-am. 25 For the whole time wey Sol′o·mon de rule, Judah people and Israel people dey safe and everybody de sitdown under im own vine tree and under im own fig tree, from Dan go reach Be′er-she′ba.
26 And Sol′o·mon get 4,000* different-different place wey e de put the horse them wey de draw im chariots and e get 12,000 horse them.*
27 Na this governors de bring food for King Sol′o·mon and everybody wey de chop for the table of King Sol′o·mon. Each of them de make sure say nothing de miss for the whole month when e be their turn to bring food. 28 Them still de bring barley and dry grass anytime wey the horse them, and the group of horse them go need-am. Each governor de do according to the work wey them give-am to do.
29 And God make Sol′o·mon get better sense and deep sense well-well. E still help-am get the heart to fit de understand things wey even plenty like sand wey dey near sea. 30 The kind sense wey Sol′o·mon get, pass the sense of all the people wey dey for the East and all the people wey dey for Egypt. 31 E get sense pass any other man, e get sense pass E′than wey be Ez′ra·hite and He′man, Cal′col, and Dar′da, the sons of Ma′hol; people know Sol′o·mon well-well for all the nations wey dey around-am. 32 E form* 3,000 proverbs and write 1,005 songs. 33 E de talk about trees, from the cedar tree wey dey for Leb′a·non go reach the hyssop tree wey de grow for wall; e de talk about animals, birds,* animals wey de crawl for ground,* and fish. 34 People from all the nations de come listen to all the sense wey Sol′o·mon get, even kings wey don hear about the sense wey e get de come from every part of the earth.