The Second Book of Chronicles
25 Am·a·zi′ah dey 25 years when e start to rule as king, and e rule for 29 years for Jerusalem. Im mama name na Je·ho·ad′dan wey come from Jerusalem. 2 E continue to do wetin correct for Jehovah eyes but e no do-am with all im heart. 3 As e just get power well-well as king of the kingdom, e kill im servants wey be kill im papa the king. 4 But e no kill their sons because e follow wetin Jehovah command, wey them write for the Law, for the book of Moses, wey talk say: “Make them no kill papa them because of their sons, and make them no kill sons because of their papa them; but make them kill each person because of im own sin.”
5 Am·a·zi′ah gather all Judah people together and talk say make them stand according to their family groups from their papa side, with their people wey de control one-one thousand soldiers and with their people wey de control hundred-hundred soldiers for all Judah and Benjamin people. E register them from 20 years go up and e see say them be 300,000 strong soldiers wey them don train* to serve for the army and them be people wey fit use lance* and big shield fight. 6 Apart from that one, e use 100 talents* of silver hire 100,000 strong soldiers from Israel. 7 But one man of the true God come meet-am and talk say: “O king, make you no allow the army of Israel people go with you because Jehovah no dey with IsraeI people, e no dey with any of the people wey come from the tribe of E′phra·im. 8 But make you go by yourself, do something and get strong heart for the war. If not, the true God fit make your enemy win you, because God get the power to help person and the power to make person fall.” 9 So Am·a·zi′ah ask the man of the true God say: “But what of the 100 talents wey I don give to Israel soldiers?” The man of the true God come answer-am say: “Jehovah get the power to give you wetin plenty pass that one by far.” 10 So Am·a·zi′ah tell the soldiers wey come from E′phra·im say make them go, e say make them go back to their own place but them vex for Judah no be small. So them go back to their own place and them de vex no be small.
11 Then Am·a·zi′ah do wetin show say e no fear. E lead im own soldiers go the Lowland* of Salt, and e kill 10,000 men of Se′ir. 12 And the men of Judah catch 10,000 of them alive. So them bring them come the top part of the rock and throw them down from the top of the rock, all of them come scatter to pieces. 13 But the soldiers wey Am·a·zi′ah be talk say make them go back say make them no follow-am go the war attack the cities of Judah, from Sa·mar′i·a go reach Beth-ho′ron; them kill 3,000 people for there and pack plenty things.
14 But after Am·a·zi′ah don kill E′dom people and come back, e bring the gods of the men of Se′ir come and arrange them as gods for imself, and e start to bow down for their front and de make sacrifice smoke for them. 15 So Jehovah vex for Am·a·zi′ah, and e send one prophet go tell-am say: “Why you de follow the gods of the people wey no save their own people from your hand?” 16 As e de talk to-am, the king come talk say: “We choose you make you be adviser for the king? Stop! You want make them kill you?” Then the prophet stop to talk, but e still talk say: “I know say God don decide say e go destroy you because of this thing wey you do so and because say you no listen to my advice.”
17 After Am·a·zi′ah wey be king of Judah don ask im advisers, e send message to Je·ho′ash the son of Je·ho′a·haz wey be the son of Je′hu the king of Israel. E talk say: “Come make we fight war with each other.”* 18 Je·ho′ash wey be king of Israel send this message to Am·a·zi′ah wey be king of Judah say: “One chuku-chuku grass for Leb′a·non send message to the cedar wey dey Leb′a·non say, ‘Give your daughter to my son make e marry-am.’ But one wicked animal for Leb′a·non wey de waka pass march the chuku-chuku grass for ground. 19 You talk say, ‘See! I* don destroy E′dom people.’ This one come de make you carry shoulder and you want make them praise you. But now make you stay for your own house.* Why you go do wetin go cause serious trouble for you and make you fall, and make Judah fall like you too?”
20 But Am·a·zi′ah no hear word, because this one na from the true God so that e go put them for the hand of the enemy as e be say them de follow the gods of E′dom. 21 So Je·ho′ash wey be king of Israel go up, and e fight war with Am·a·zi′ah wey be king of Judah for Beth-she′mesh, wey dey the land of Judah. 22 Israel people win Judah people, so each of them run go im house.* 23 For Beth-she′mesh, Je·ho′ash wey be king of Israel catch Am·a·zi′ah the king of Judah, wey be the son of Je·ho′ash the son of Je·ho′a·haz.* Then e bring-am come Jerusalem and e break some part of the wall for Jerusalem, from the Gate of E′phra·im go reach the Corner Gate, the place reach 400 cubits.* 24 E carry all the gold and the silver and all the things wey them see for the house of the true God wey dey with O′bed-e′dom* and the ones wey dey for the place wey them de keep better-better things for the house* of the king, e still carry people. Then e go back to Sa·mar′i·a.
25 Am·a·zi′ah the son of Je·ho′ash wey be the king of Judah still live for 15 years after Je·ho′ash the son of Je·ho′a·haz wey be the king of Israel don die. 26 As for the other story about Am·a·zi′ah, from the start go reach the end, see! them no write-am for the Book of the Kings of Judah and Israel? 27 From the time wey Am·a·zi′ah stop to follow Jehovah, them make wicked plan against-am for Jerusalem, e come run go La′chish, but them send people follow-am go La′chish and them kill-am for there. 28 So them use horse them carry-am come back and them bury-am with im papa-papa them for the city of Judah.