Deuteronomy
20 “If you go fight war with your enemies and you see say their horse them, chariots and soldiers plenty pass your own, make you no fear them because Jehovah your God wey bring you come out from the land of Egypt dey with you. 2 When una want comot go fight, make the priest come talk to the people. 3 Make e tell them say, ‘Make una hear, O Israel, una go soon comot go fight with una enemies. Make una heart no weak. Make una no fear or shake with fear because of them, 4 because Jehovah una God de march with una to go fight for una against una enemies and to save una.’
5 “Make the officers too ask the people say, ‘Anybody dey wey don build new house and wey never start to stay inside? Make e go back to im house. If no be so, e fit die for the war and another man go start to stay inside. 6 And anybody dey wey don plant vine farm and wey never start to use-am? Make e go back to im house. If no be so, e fit die for the war and another man go start to use-am. 7 And anybody dey wey don promise woman say e go marry-am and e never marry-am? Make e go back to im house. If no be so, e fit die for the war and another man go marry-am.’ 8 Make the officers still ask the people say, ‘Anybody dey wey de fear and wey im heart weak? Make e go back to im house, so that e no go make im brothers fear like-am.’* 9 When the officers don talk to the people finish, make them choose people wey go de control the armies to lead the people.
10 “If you don de near any city to fight with-am, make you still announce to the city the things wey them go do to make peace with you. 11 If the city agree to make peace with you and them open gate for you, make all the people wey you see for there be your own wey you go de command to work, and them go work for you. 12 But if the city no gree make peace with you, and instead, e want fight war with you, make you surround-am, 13 and Jehovah your God go surely put the city for your hand, and you must use sword kill all the men wey dey inside. 14 But, the women, the children, the animals, and everything wey dey inside the city, all the better-better things, you fit carry them for yourself and you fit chop the better-better things wey your enemies get, wey Jehovah your God don give you.
15 “That one na wetin you go do all the cities wey really dey far from where you dey, wey no dey among the cities of this nations wey near you. 16 But for inside the cities of this people wey Jehovah your God de give you as your property, make you no allow anything wey de breathe to dey alive. 17 Instead, make you destroy them finish, Hit′tite people, Am′or·ite people, Ca′naan people, Per′iz·zite people, Hi′vite people, and Je′bus people, just as Jehovah your God don command you; 18 so that them no go teach una to do all the serious bad things wey them don do as them de worship their gods, wey go make una sin against Jehovah una God.
19 “If you surround any city because you want take over-am and you don de fight against the city for plenty days, make you no use ax cut the trees wey dey there comot. You fit chop from them, but make you no cut them comot. You go attack tree wey dey for bush just as you go attack person? 20 You fit cut only the tree wey you know say them no de use for food. You fit cut-am and use-am surround the city wey de fight against you, until you win-am.