Joshua

23 Long time* after Jehovah don give Israel rest from all im enemies wey dey around-am, when Joshua don really old, 2 Joshua call all Israel people, the elders, the heads of the people, the judges, and the officers, and e tell them say: “I don really old. 3 And una don see with una own eyes all the things wey Jehovah una God do to all this nations for una because na Jehovah una God be de fight for una. 4 See, I don use lot give una* the land of the nations wey remain as property for una tribes, together with the land of all the nations wey I destroy, from River Jordan go reach the Great Sea* for the west side.* 5 And na Jehovah una God be the person wey continue to push them comot from una front, and e drive them comot* for una, and una take their land as una own, just as Jehovah una God don promise una.

6 “Now una heart must strong well-well so that una go fit obey and follow all the things wey them write for the book of the Law of Moses, make una no ever comot from-am to go the right side or to go the left side, 7 and make una no ever join body with the nations wey remain with una. Make una no even mention the names of their gods or use them swear, and make una no ever serve them or bow down to them. 8 But una must hold Jehovah una God tight just as una don do reach today. 9 Jehovah go drive big* and strong nations comot from una front, na im make nobody don fit stand for una front come reach today. 10 Na only one man among una go pursue one thousand people, because Jehovah una God de fight for una, just as e don promise una. 11 So make una de always watch unaself,* de love Jehovah una God.

12 “But if una try to turn back and hold wetin remain for this nations wey still dey among una tight, and una make marriage agreement with them* and de do things with them, and them de do this things with una, 13 make una surely know say Jehovah una God no go continue to drive this nations comot* for una. Them go be trap and danger and them go be like cane wey them de use flog una for una sides and like chuku-chuku for una eyes, until una don die finish from this good land wey Jehovah una God don give una.

14 “Now see! I go soon die,* and una really know with all una heart and with all una soul* say no single word out of all the better promise them wey Jehovah una God don tell una don fail. All of them don happen for una. No single word out of wetin e talk don fail. 15 But just as all the better promise them wey Jehovah una God tell una don happen for una, na so Jehovah go bring all the punishment wey e don promise* ontop una and go destroy una from this good land wey Jehovah una God don give una. 16 If una break the agreement of Jehovah una God wey e don command una to keep and if una go serve other gods and bow down to them, then Jehovah go really vex for una and una go die quick-quick from the good land wey e don give una.”