Deuteronomy
7 “When Jehovah your God bring you come inside the land wey you go soon enter and take as your own, e go still drive nations wey get plenty-plenty people comot from your front: Hitʹtite people, Gir′gash people, Am′or·ite people, Ca′naan people, Per′iz·zite people, Hi′vite people, and Je′bus people, seven nations wey plenty and strong pass you. 2 Jehovah your God go put them for your hand and you go win them. Make you no fail to destroy them. Make you no make any agreement with them or show them any favor. 3 Make you no make any marriage agreement with them.* No give your daughters to their sons or take their daughters for your sons. 4 Because them go make your sons stop to follow me and start to serve other gods; then Jehovah go really vex for you and e go destroy you quick-quick.
5 “Instead, this one na wetin una go do them: Destroy their altars, break their idol pillars, cut their idol poles,* and burn their image them wey them carve. 6 Una be holy people to Jehovah una God and Jehovah una God don choose una to be im people, im special property,* out of all the people wey dey the earth.
7 “No be because una plenty pass all the people na im make Jehovah show una love and choose una, because na una small pass all the people. 8 Instead, na because Jehovah love una and because e keep the promise wey e don swear to una papa-papa them, na im make Jehovah bring una come out with strong hand, to buy you back from the place wey you be dey as slave, from the power* of Phar′aoh the king of Egypt. 9 You really know say Jehovah your God na the true God, the faithful God wey de keep im agreement and de show love wey no de fail to thousand generations of people wey love-am and de obey im commandments. 10 But for people wey hate-am, e go destroy them direct* as pay back. E no go dey slow to deal with people wey hate-am, e go pay them back direct.* 11 So, make you sofri obey the commandments and the directions and the decisions wey I de command you today as you de follow them.
12 “If una continue to listen to this things wey I don decide and una obey them and do them, Jehovah your God go keep the agreement and show you love wey no de fail wey e swear about, to your papa-papa them. 13 E go love you and bless you and make you plenty. Yes, e go bless you with plenty children* and bless wetin your soil go produce, your grain, your new wine, your oil, the small-small ones of your animals and the small-small ones of your sheep, for the land wey e swear to your papa-papa them say e go give you. 14 Na you go get blessing pass among all the people; no man or woman go dey among your people wey no go fit get pikin, and no animal among your animals go dey wey no go fit get pikin. 15 Jehovah go remove sickness from all of una and e no go bring any of the serious disease them wey you don know for Egypt make e catch you. Instead, e go bring them make e catch all the people wey hate you. 16 You go kill* all the people wey Jehovah your God put for your hand. Make you* no sorry for them, and make you no serve their gods because that one go be danger* for you.
17 “If you talk for your heart say, ‘This nations plenty pass us. How I fit drive them comot?’ 18 make you no fear them. Make you remind yourself about wetin Jehovah your God do Phar′aoh and the whole Egypt, 19 the strong judgments* wey your eyes see and the signs and the miracles and the strong hand and the powerful hand* wey Jehovah your God use bring you come out. This one na wetin Jehovah your God go do to all the people wey you de fear. 20 Jehovah your God go make life tire* them, until the people wey remain and wey de hide from you go die finish. 21 Make you no fear because of them, because Jehovah your God dey with you, God wey dey great and wonderful.
22 “Jehovah your God go surely drive this nations comot from your front small-small. Make you no destroy them quick-quick, so that the bush animals no go plenty and attack you. 23 Jehovah your God go put them for your hand and win them finish until them die finish. 24 E go put their kings for your hand and you go remove their names from under heaven. Nobody go stand against you until you destroy them finish. 25 Make una use fire burn the image of their gods wey them carve. No get long throat for the silver and the gold ontop them or take-am for yourself, so that e no go be trap for you, because na something wey Jehovah your God really hate. 26 Make you no ever bring rotten thing come inside your house so that you no go be something wey them go destroy like the rotten thing. Make you see-am as something wey really dirty and make you really hate-am, because na something wey them go destroy.