The First of Kings
16 Then Jehovah use Je′hu the son of Ha·na′ni talk wetin e go do Ba′a·sha say: 2 “I raise you comot from dust, and make you leader for my people Israel, but you continue to do like Jer·o·bo′am and you make my people Israel sin sotey them make me vex because of their sins. 3 So I go sweep Ba′a·sha and im family* comot, and I go make im family be like the family of Jer·o·bo′am the son of Ne′bat. 4 Anybody for Ba′a·sha family wey die for city, dogs go chop-am, and anybody for im family wey die for bush, birds wey de fly for up go chop-am.”
5 As for the other story about Ba′a·sha, wetin e do and how e get power reach, them no write-am for the book wey talk about the things wey happen for the time of Israel kings? 6 Then Ba′a·sha die like im papa-papa them, and them bury-am for Tir′zah; and E′lah im son start to rule as king after-am. 7 Jehovah still use prophet Je′hu the son of Ha·na′ni talk wetin e go do Ba′a·sha and im family* because of all the bad things wey Ba′a·sha do wey Jehovah see, as e make-am vex with the things wey e do wey make-am come be like people for Jer·o·bo′am family, but no be only because of this one, but because e still kill Naʹdab.*
8 For the 26th year of A′sa wey be king of Judah, E′lah wey be the son of Ba′a·sha come be king for Israel for Tir′zah, and e rule for two years. 9 Im servant wey im name na Zim′ri, wey de control half of im soldiers wey de use chariot fight, plan against-am when e dey for Tir′zah de drink sotey e come dey drunk for the house of Ar′za wey dey in charge of im family for Tir′zah. 10 Zim′ri enter the place and attack-am and kill-am for the 27th year wey A′sa be king for Judah, and e start to rule as king after-am. 11 When e don start to rule as king, as e just sitdown for im throne, e kill everybody for Ba′a·sha family, e no leave one single man,* whether the man come from im family* or na one of im friends. 12 Na so Zim′ri take kill everybody for Ba′a·sha family,* just as Jehovah don use prophet Je′hu talk say na wetin go happen to Ba′a·sha be that. 13 This one happen because of all the sin wey Ba′a·sha and im son E′lah don commit, and because of the sin wey them don make Israel people sin, as them make Jehovah the God of Israel vex with their useless idols. 14 As for the other story about E′lah, everything wey e do, them no write-am for the book wey talk about the things wey happen for the time of Israel kings?
15 For the 27th year of A′sa wey be king for Judah, Zim′ri start to rule as king for Tir′zah, and e rule for seven days. That time, the soldiers don set camp to fight against Gib′be·thon wey be Phi·lisʹti·a people city. 16 After some time, the soldiers wey dey the camp hear people de talk say: “Zim′ri don plan against the king and still kill-am.” So all Israel make Om′ri wey de control the army, king for Israel that day for the camp. 17 Om′ri and all Israel people wey dey with-am comot from Gib′be·thon go surround Tir′zah. 18 When Zim′ri see say them don take over the city, e come enter the strong tower wey dey the king house,* and burn the house down as e dey inside, and e die. 19 This one happen to-am because of im own sin wey e commit as e do wetin bad for Jehovah eyes, and do like Jer·o·bo′am, and because of the sin wey e don make Israel people to sin. 20 As for the other story about Zim′ri and the wicked plan wey e plan, them no write-am for the book wey talk about the things wey happen for the time of Israel kings?
21 Na that time Israel people come divide into two groups. One group de follow Tib′ni wey be the son of Gi′nath, and them be want make-am king. But the other group de follow Om′ri. 22 But the people wey de follow Om′ri come win the people wey de follow Tib′ni the son of Gi′nath. So Tib′ni die, and Om′ri start to rule as king.
23 For the 31st year of A′sa wey be king for Judah, Om′ri start to rule as king for Israel, and e rule for 12 years. E rule for six years for Tir′zah. 24 E use two talents* of silver buy the mountain of Sa·mar′i·a from She′mer and e build city ontop the mountain. E call the city wey e build Sa·mar′i·a.* Na the name of the owner* of the mountain wey be She′mer e use name the city. 25 Om′ri continue to do wetin bad for Jehovah eyes, and e worse pass all the people wey dey before-am. 26 E continue to do everything wey Jer·o·bo′am the son of Ne′bat don do, and e no comot from the sin wey e don make Israel people sin as them make Jehovah the God of Israel vex with their useless idols. 27 As for the other story about Om′ri, wetin e do and how e get power reach, them no write-am for the book wey talk about the things wey happen for the time of Israel kings? 28 Then Om′ri die like im papa-papa them, and them bury-am for Sa·mar′i·a; and im son A′hab start to rule as king after-am.
29 Na for the 38th year of A′sa wey be king for Judah, A′hab the son of Om′ri start to rule as king for Israel, and A′hab the son of Om′ri rule Israel for Sa·mar′i·a for 22 years. 30 A′hab the son of Om′ri bad for Jehovah eyes pass all the people wey dey before-am. 31 E commit the kind sin wey Jer·o·bo′am the son of Ne′bat commit, but like say that one no mean anything for-am, e still marry Jez′e·bel the daughter of Eth·ba′al, wey be king of Si′don people, and start to worship Ba′al and bow down to-am. 32 E still build altar for Ba′al for the house* of Ba′al wey e build for Sa·mar′i·a. 33 A′hab still make idol pole.* A′hab do more bad things to make Jehovah the God of Israel vex, pass all the kings for Israel wey dey before-am.
34 Na for im time, Hi′el wey come from Beth′el build Jer′i·cho again. When e build the foundation, im firstborn wey be A·bi′ram die, and when e put the doors for the city, im last son wey be Se′gub die, just as Jehovah don use Joshua the son of Nun talk say e go happen.