The Second of Kings

12 For the seventh year of Je′hu, Je·ho′ash start to rule as king, and e rule for Jerusalem for 40 years. Im mama name na Zib′i·ah wey come from Be′er-she′ba. 2 Je·ho′ash continue to do wetin good for Jehovah eyes all the time wey Je·hoi′a·da wey be priest de advice-am. 3 But the high place them* be still dey and the people still de sacrifice and de make sacrifice smoke ontop the high place them.

4 Then Je·ho′ash tell the priests say: “Make una collect all the money wey people de bring come Jehovah house for the holy offerings, the tax wey each person must pay, the money wey them don decide for each person,* and all the money wey each person use im heart bring come Jehovah house. 5 The priests go collect the money by theirself from the people wey bring-am* and use-am repair the house, anywhere wey don spoil* for the house.”

6 By the time e reach 23 years wey Je·ho′ash don be king, the priests never still repair the place them wey don spoil for the house. 7 So King Je·ho′ash call Je·hoi′a·da wey be priest and the other priests, and e ask them say: “Why una no de repair the place them wey don spoil for the house? Because of this one, make una no collect any money again from the people wey de bring-am, unless una want use-am repair the house.” 8 So, the priests come gree say them no go collect any money again from the people and say no be their hand e go dey to repair the house.

9 Then Je·hoi′a·da wey be priest carry one box and put hole for the cover and put-am near the altar for the right side as person de enter the house of Jehovah. Na there the priests wey their work na to watch the door de put all the money wey people de bring come Jehovah house. 10 Anytime wey them see say plenty money don dey inside the box, the king secretary and the high priest go come collect* the money wey people don bring come Jehovah house and count-am. 11 Them go carry the money wey them don count give the people wey them don choose to de check the work wey the people de do for Jehovah house. Then this people go come carry the money pay the carpenters, and the builders wey de do the work for Jehovah house, 12 with the bricklayers, and the people wey de cut stones. Them still buy timbers and stones wey them don already cut to different-different shapes and size, so that them go use-am repair the place them wey don spoil for Jehovah house. Them still use the money for every other thing wey them do to repair the house.

13 But them no use any of the money wey the people de bring come Jehovah house take make silver basins, things wey them de use quench fire, bowls, trumpets, or any kind thing wey them de use gold or silver make, wey them de put for Jehovah house. 14 Na only the people wey de do the work them de give the money, and them use-am repair the house of Jehovah. 15 Them no de ask the men wey them give the money to give the workers how them de use the money, because them be men wey them fit trust. 16 But the money for offerings for the bad thing wey person do and the money for sin offerings, them no de bring-am come Jehovah house; na the priests get-am.

17 Na that time Haz′a·el wey be king of Syria comot go fight Gath, and e win-am. After that one, e come decide to attack Jerusalem. 18 So King Je·ho′ash wey de rule Judah carry all the holy offerings wey im papa-papa them, Je·hosh′a·phat, Je·ho′ram, and A·ha·zi′ah, wey be kings for Judah be don make holy, and im own holy offerings, and all the gold wey e see for the place wey them de keep the better-better things for Jehovah house and for the king house,* and e send them go give Haz′a·el the king of Syria. So Haz′a·el no attack Jerusalem.

19 As for the other story about Je·ho′ash, everything wey e do, them no write-am for the book wey talk about the things wey happen for the time of Judah kings? 20 But im servants join do one wicked plan against-am, and them kill-am for the house of the Hill* for the road wey person fit pass go Sil′la. 21 Na im servants wey be Jo′za·car the son of Shim′e·ath and Je·hoz′a·bad the son of Sho′mer chuk-am and kill-am. Them bury-am with im papa-papa them for the City of David, and im son Am·a·zi′ah start to rule as king after-am.